Grammy history-a nomination hmu tam ber Jay-Z

Rapper Jay-Z chu Grammy history-ah nomination 83 hmu tawhin, nomination hmu tam ber a ni ta.

Thawhlehnia puanzara awm ta Grammy nomination list-ah khan Jay-Z hming hi hmun thum laiah a lang leh a, hei vang hian ani aia Grammy nomination hmu tam an awm ta lo.

Grammy award 23 lai dawng tawh Jay-Z hi Kanye West album 'Donda'-ah a tha a thawh ve avangin Album of the Year category-ah a hming a lang a, Best Rap Song category-ah DMX leh Kanye West a pui avangin a hming hmun hnihah a lang bawk.

Grammy nomination puan a nih hma kha chuan producer Quincy Jones nen nomination hmu tam ber an ni a, 80 ve ve an hmu tawh a, tunah hian Jay-Z chuan Quincy Jones hi a tlansan ta a ni. Hetihlai hian Grammy nomination hmu tam ber record siam tura rin zinga mi The Beatle member hlui Paul McCartney chuan 81 a hmu ve thung a, nomination list thar berah khan best rock album leh best rock song-ahte a hming a lang a ni.