Indian actor Sushant Singh Rajput a thi

'M.S. Dhoni: The Untold Story' actor Sushant Singh Rajput chu nimin khan Bandra, Mumbai-a a chenna inah a inawkhlum.

Sushant Singh Rajput hi kum 34 mi a ni a, kum 2013-a tlangzarh 'Kai Po Che!' hmangin India film industry a luhchilh ṭan a, nikuma tlangzarh  Jacqueline Fernandez nena an chan dunna Netflix film Drive kha a film inlan tawpna ber a ni ta a ni.

Chetan Bhagat novel 'The 3 Mis­takes of My Life' beh­chhana film siam  Kai Po Che!-a lea­ding role changtu tur pathum zinga thlan a nih hnu hian Bollywood in­dustry-ah hming a chher chho nghal a,  Film­fare Award for Best Male Debut nomination a hmu nghal a ni.

Kum 2013-a tlangzarh tho romantic comedy Shuddh Desi Romance-ah inlan lehin  Detective Byomkesh Bakshy! leh PK-ahte pawh khan a inlan a, kum 2016-a sports biopic lar tak  M.S. Dhoni: The Untold Story-a a chan hnu phei chuan Indian actor zinga hriat hlawh ber pawl a ni tawh a,  Filmfare Award for Best Actor nomination pawh a hmu hial.

A hlawhtling chho zel a, Kedar­nath leh Chhichhore-ahte pawh inlan lehin kum 2019-a Netflix film lar tak Drive kha a film chan tawpna a ni ta a, film chang tam hman lo mah se a lar hman hle.

Movie puitlinga a inlan hma hian kum 2008 leh 2012 inkar khan TV show hrang hrangah a inlan a, mahse Kai Po Che! a chan hma hi chuan hriat a hlawh em em hran lo.

Kum sarih chhung vel lek film industry-a a hun a hman chhung hian chawimawina ngaih hlut a dawng hnem hman hle. Kai Po Che! a chan hma pawh hian award eng emaw zat a dawng hman.

A award dawng zingah hian Indian Film Festival of Melbourne pawh a tel a, International Indian Film Academy Awards, Filmfare Awards leh Zee Cine Awards-ahte pawh nomination a hmu a ni.

2014    Screen Awards 

    Best Male Debut

2014    Producers Guild Film Awards

    Best Male Debut

2017    Screen Awards

    Best Actor (Critics)

2017    Indian Film Festival of Melbourne

    Best Actor

He thu buatsaih lai thleng hi chuan a inawh hlum chhan hi hriat a la ni lo a, police-te chuan an chhui chiang mek tih an sawi. Thawhṭanni liam ta khan a manager hlui Disha Salian chu a intihlum a, hemi vang hian Sushant Singh Rajput hi a rilru a hrehawm hle tih erawh tarlan a ni thung.

Sushant Singh Rajput hi midang ṭanpuina kawngah pawh thawh hlawk tak a ni a, kum 2018 August khan Kerela tui lian tuarte tan Rs vbc 1 a thawh a, kum 2018 vek September khan Nagaland tuilian tuarte tan Rs vbc 1.25 a pe bawk a ni.

A channa pakhat John Green-a 2012 novel 'The Fault in Our Stars' behchhana siam Dil Bechara chu tlangzarh hman a ni ta lo a, he film hi July, 2018 khan an chang ṭan tawh a, kumin hian tlangzarh hman tura ruahman a ni.