Natalie Grant album thar a hnai

Dove Award-a a zawna kum li chhung Female Vocalist of the Year award dawng thei Natalie Grant chuan August 28 hian album thar 'No Stranger' a tlangzarh dawn.

Grant hian studio album pakua lai a tlangzarh tawh a, kum 1999 khan a album hmasa ber 'Natalie Grant' chu a tlangzarh tawh a ni. Kum 48 lai a ni ve tawh a, kum 2015-a 'Be One' album a tlangzarh hnuah album a la tichhuak leh lo a, 'No Stranger' hi kum nga chhunga a album tlangzarh leh hmasa ber tur a ni. Hun eng emaw chen thawm a neih loh hnuah album thar a tichhuak dawn tih a rawn puang leh ta a, Natalie Grant zai ngaihthlak nuamti tan chuan thu lawmawm tak a ni ngei ang.

Khawthlang lam gospel music ngaithla ṭhinte chuan he hla hi an hre ngei ang. Gospel band lar tak Casting Crowns-in kum 2005-a an lo sak lar tawh kha niin Natalie hian a album thar tur 'No Stranger'-ah hian a cover chu a dahtel a, kar hmasa khan a audio chu streaming service platform hrang hranga ngaihthlak theih turin a dah chhuak tawh nghe nghe.

"He hla hi ka pasal leh Casting Crowns member Mark Hall-te'n kum 15 dawn liam taa an phuah kha niin, cancer vanga kum 2017-a ka nuna harsatna lian tak thleng kara min hnemtu hla a ni ang tih ngaihna reng reng ka hre ngai lo. Ka tana hla hlu tak a nih tak avang hian record turin thutlukna ka siam ta a ni. London Symphony nen nikum nipuiah khan kan record a, tun ang hun harsa tak taka thuchah ṭha tak keng a ni ang tih ka ring pha lo," tiin 'Praise You in This Storm' chungchang hi a sawi.

Natalie Grant hian ama version ngeiin mawi takin a sa a, he hla phuahtu Mark Hall pawhin a fak hle a, Natalie hian he hla hi mawi takin a sa a, a nihna tur ang takin a sa chhuak a ni, a ti.

Natalie Grant hian kum 2017 khan thyroid cancer a nei tih hriat chhuah a ni a, October thlaah zai niin  kar sarih chhungin a aw a nei let leh hman vek a ni. A facebook page-ah pawh,"Ka aw pangai nei let leh turin thla sarih lai a ngai ang tih min hrilh a, mahse Pathianin kar sarih chhungin ka aw min pe let leh a ni," a ti.

October thlaah zai ni mah se December-ah chuan Chrismas tour nei turin a inbuatsaih thu a sawi leh daih tawh a ni.

Grant hian kum 2006, 2007, 2008 leh 2009 khan  Gospel Music Association Dove Award-ah  Female Vocalist of the Year award a dawng thei a, hei hian Christian music huang chhunga a tlaknat zia a tilang chiang awm e, Grammy Awards-ah pawh nomination pali lai a hmu tawh bawk.