No Time to Die tlangzarh hun thar puang

James Bond film thar ber tur, mi tam takin an nghahhlelh em em 'No Time to Die' tlangzarh hun thar puan a ni a, November 12-ah tlangzarh a ni dawn.

'No Time to Die' hi April thlaa tlangzarh tawh tura ruahman kha a ni a, mahse hripui len avanga theatre tam tak khar a nih tak avangin leh hri lengin ziaawm lam a pan theih tak loh avangin November 25-a tlangzarh a nih tur thu official-in an puang tawh a ni.

Hetiang hi ni mah se 'No Time to Die' Twitter account chuan tlangzarh hun thar hi a tarlang leh tawh a, UK-ah November 12-ah an tlangzarh dawn a, US-ah chuan November 20-ah an tlangzarh thung ang.

'No Time to Die' hi Daniel Craig James Bond lema a chan tawp ber tur a ni tawh dawn a, Craig pawh hian kumin kumtir lamah khan Bond role chu lungdam takin a kalsan dawn tih a lo sawi tawh.

James Bond film hi 24 lai tlangzarh a ni tawh a, 'No Time to Die' hi a 25-na tur a ni. 'Dr. No' kha James Bond film hmasa ber a ni a, kum 1962-a tlangzarh tawh kha niin mi parukin James Bond role hi an chang tawh a, an la larpui em em vek a ni.

'No Time to Die' budget hi a tam hle a,  $makatduai 250 lai senga siam niin Bohemian Rhapsody star Rami Malek pawh a inlan dawn a, Léa Seydoux pawh a inlan leh dawn bakah Naomie Harris pawh a inlan dawn.