Sunsilk Mega Miss North East - Mariam Longri Garnier Men Mega Mister - Pawan Chhetri

India hmarchhaka beauty pageant thlanna lian ber chu thlanna chu kar kalta Inrini khan zawhfel a ni ta a, Sunsilk Mega Miss North East 2018 atan Arunachal Pradesh nula Mariam Longri chu thlan a ni. Assam tlangzal Pawan Chhetri chu Garnier Men Mega Mister North East 2018 atan thlan a ni bawk.

Hetih lai hian Mizoram aṭanga tel mi pali te chu top 3-ah an inhlangkai zo lo a, mipa lamah C.Lalngaihawma chu top 5-ah inhlangkai thung.

Mega Miss chu...

Mega miss thlan hian ngaihven a hlawh ṭhin hle a, kuminah pawh state pariat aṭangin nula 'kei ka ni' inti an fuankhawm a ni. Intihsiakna hrang hrang neih a nih hnuah Itanagar nula Mariam Longri chuan endiktute mit a tlung ber a, Mega Miss North East 2017 Mary Khyriem chuan crown a khum tir a ni.

Kum 17 mi Mariam chuan, "Hlawhtlinna ka chan avangin ka lawm tak zet a ni. Midangte tana malsawmna ni turin theihtawp chhuah ka duh a, chu mi tur chuan ka bei dawn a ni" a ti. Hmarchhak state leh a mi chengte hmasawna a ngaihpawimawh thu a sawi bawk.

Mega Miss-ah hian Nagaland nula Tsurila chu first runners up niin, Jyotismita Baruah chu second runners up a ni. Tsurila hian Mt. Mary College, Chumukedima-ah BA (economics) a zir mek a, Jyotismita pawh hian Jyotismita pawh hian B Borooah College, Guwahati-ah BSc a zir mek a ni.

Mega Mister lam hi...

Garnier Men Mega Mister thlanna hi ṭum riat neih a lo ni tawh a, kuminah a vawi kua nan hlawhtling taka neih a ni leh ta bawk. Kar kalta Zirtawpni tlai khan result hi puan a ni a, Assam-a Jorhat tlangval Pawan Chhetri chu winner a ni. Agartala tlangval Mitrayan de Sarkar chu first runners up niin, Assamese Hirok Jyoti Kalita chu second runners up a ni.

Mipa bikah hian contestant 48 ten Grand Finale an lut a, kar khat vel grooming leh training session neihpui an ni. Mizoram aṭnga tel zinga mi C.Lalngaihawma chu top 5-ah a inhlangkaiin, thleng sang ber a ni.

Kuminah hian winner te hian pawisa fai Rs.100,000 an dawng a, Dubai an zin theih dawn bawk. Heng bakah hian ham ṭhatna hrang hrang a la awm cheu bawk a, an lawmman dawn tur hi a vai chuan Rs. 700,000 hu vel zet a ni.

Sunsilk Mega Miss & Garnier Men Mega Mister North East 2018 hi ITA Cultural Complex, Machkhowa-ah neih a ni a, Grand Finale hi a hmunah mi 1,000 vel zetin an chhim a ni.