Hontrade International Ṭhazual Fakna ; Ruth CVL Muanpuii a thiam ber
Dawrpui Vengthar nula Ruth CLV Muanpuii chuan Hontrade International Ṭhazual Fakna chart-ah pakhatna a hauh a, dinhmun sang ber a luah ṭum khatna a ni.
Ruth-i hian Penticost Sunday pual khan hla thar 'Chenchilhtu Thlarau Thianghlim' tih chu a tichhuak a, he hla hmang hian No. 1 hi a hauh a ni. Ruth-i chuan, "Tun dinhmun ka thlen theihna chhan chu Pathian vang a ni a, ka hla min thlan saktute chungah lawmthu ka sawi bawk a ni. Chart-a dinhmun sang ber ka luah ṭumkhatna a nih avangin a lawmawm dan a thuah hnih khawp mai," tiin a sawi.
"Zonet leh MDM te hmalakna fakawm ka ti a, zaithiam te tan chuan an hlu tak zet a ni" tiin, an chungah lawmthu a sawi bawk.
He hla ṭha tak hi Upa Sanglianthanga phuah a ni a, midang ngenna vang leh collection vela a zai tih loha ama pual bika music video a tichhuah hmasak ber a ni nghe nghe. Ruth-i hian MDM ah hian pahnih a dah tawh a, pakhat zawk chu 'Chenchilhtu Thlarau Thianghlim' tih hi a ni. Chart-ah pawh a lo lang tawh ṭhin a, dinhmun sang ber luah turin hun a mamawh rei lo hle.
Tun ṭum chart-ah hian Alabasta chuan pahnihna an hauh. An hla 'Aw pan mai rawh' tih hmang hian chart-ah an lang zing ta vaiu a, No. 1 thleng turin an dinhmun a ṭha hle. Pathumna-ah hian Amtea a awm ve thung a, a hla thar 'Adonai Ropui Ber' chu a hlawhtlinpui mek.
Chart hmasa lama pakhatna R. Lalruatfeli (Mapuii) chuan 'Ka nun hnar kaitu' tih hla hmangin palina a hauh a, Mawitei Ralte chu top 5-ah a lang bawk. 'Siamtu kutchhuak' tih hla mawi taka satu Seraphic Choir te chu parukna an ni a, Idol aṭanga mipui hriat hlawh Thawhlehnaniropuia chu pasarihna a ni.
Top 10-ah hian Miriam Lalnundiki leh Judith Lalremruati te an lang a, Govt. Complex KṬP Female Voice te an lang ve leh bawk.
Hontrade International Ṭhazual Fakna Top 10
1. Ruth CVL Muanpuii - Chenchilhtu Thlarau Thianghlim
2. Alabasta - Aw pan mai rawh
3. Amtea - Adonai Ropui Ber
4. R. Lalruatfeli (Mapuii) - Ka nun hnar kaitu
5. Mawitei Ralte - Ka nun hnar kaitu
6. Seraphic Choir - Siamtu kutchhuak
7. Thawhlehnaniropuia - Khawngaih Chhandamna
8. Miriam Lalnundiki - Damna kim a ni
9. Judith - Kan famkimna
10. Govt. Complex KṬP Female Voice - Lalpa tan