World Cup WAGS Stadium chhunga mipui mit fukna

Ram 32 telna FIFA World Cup 2018 chu khelh mek zel a ni a, he 'khawvel en­nawm ropui ber' entu zingah hian mi langsar tak tak an kat nuk mai. Footballer kawppuite chauh an ni lo a, mi lar tam tak pawhin an ram inkhel a hmunah an en hlawm a ni.

Model, royal leh WAG an kim a, hei hian he infiamna ropui zia a tarlang kan tithei ang. Brazillian model chhuanvawr Alessandra Ambrosio chuan an ram inkhel a hmunah a ṭawiawm a, jersey eng leh kekawr bul nen stadium chhung a mawi a ni.

World Cup entu zingah hian Belgium lal King Philippe pawh inkhel entu zingah telin, a fate pahnih Prince Emmanuel leh Prince Gabriel te a hruai ve bawk.

Thlir bik te

Stadṭium chhungah mi sing tam tak an pungkhawm ṭhin a, chung zingah chuan en bik hlawh an awm. TV lama lang lem lo, photographer ten thla an lo laksak, a hnua social media lama hit tak tak pawh hmuh tur a tam hle.

Champion lai German siban nghak Kevin Trapp kawppui Victoria Secret model pawh lo ni tawh ṭhin Izabel Goulart hi inkhel entu zinga mi mit fukna ber pakhat a ni. Brazilian model, chhe lo zet mai hian an ram jersey ha chhungin staduim chhung a lut a, a kawppui Kevin Trapp telna Germany team au phurtu zingah tel lo!

Iceland chu an tum ram thleng pah loin tla tawh mah se, an star player Gylfi Sigurdsson-a nupui Alexandra Ivarsdottir kha Wolrd Cup tingaihnawmtu zinga pakhat a ni. Miss Iceland atana thlan lo ni tawh Ivarsdottir hian a pasal inkhel hi a hmunah ṭawiawmin, inkhelh banah thla te pawh an la dun a ni.

Argentina an hneh hnua champion tura rinkai ni zui ta, France player te pawhin an kawppuite an hruai fur hlawh a, chung zingah chuan Florian Thauvin ṭhiannu Charlotte Pirroni hi mipui mit fukna ber pakhat a ni. Miss France contest-a runners up pawh lo ni tawh Pirroni (24) hian an ram a la au phur zui zelin a rinawm.

Camille Tytgat chuan a pasal Raphael Varane inkhel chu a hmunah a ṭawiawm a, France leh Denmark inkhel kha a hmunah a en a ni.

Ṭum dang ang bawkin England player te kawppui te chuan thawm an nei lian leh ber a, zanriah te pawh an lo kilho leh hman tawh. Stadium chhungah pawh an ram tan theih tawp an chhuah a, Megan Davison, Annie Kilner leh Rebekah Vardy te chuan hmun khat aṭangin an lo ṭawiawm a ni.