Bollywood film Sanju a inlar Ropuina ramah Jurassic World
Bollywood film chhuak thar Sanju chu North America Box Office-ah a inlar a, sum lakluh tam lamah pariatna a hauh phak hial. Hetih lai hian beisei ang ngeiin Jurassic World: Fallen Kingdom a ropui a, a zawnin sum lalut hnem ber dinhmun a luah.
Jurassic World-in a zawna pakhatna a hauh lai hian, Avengers : Infinity War erawh top 10 aṭangin nek chhuahin a awm ve thung.
Science fiction/action film, Jurassic World hian North American Box Office aṭang ringawtin $mtd 729.8 zet a lalut tawh a, roreltu a ni mek. June 8-a tlangzarh hian kar liam ta chhung khan $mtd 60 a la lut leh a, sum lakluh tam lamah khum thei an la awm lo.
Jurassic World: Fallen Kingdom hian khawvel hmun hrang hrangah kar liam ta chhung khan $mtd 116 a lalut a, sum hailut hnem ber dinhmun a luah mek bawk. Chris Pratt leh Bryce Dallas Howard te channa film hi a sum lakluh tawh zawng zawng chu $mtd 932.3 a ni a, a che ṭha rih hle.
June thlaa tlangzarh tho Incredibles 2 chu sum lalut tam pahnihna niin, kar liamta khan $mtd 46 a lalut. Incredibles 2 hian $mtd 80.9 lalutin pahnihna hi a lo hauh tawh a, mahse Jurassic World a khum theih loh avangin a dinhmun ngai a luah leh a ni.
Hetih lai hian crime film, Sicario: Day of the Soldado chuan $mtd 19 lalutin top 3-ah in hlangkai. Uncle Drew chu sum thawk chhuak hnem palina niin, Ocean's 8 chuan a dawt. Ocean's 8 pawh hi a sum lakluh a tlahnim ve hret hret a ni. Deadpool 2 leh Solo: A Star Wars Story te chu top 10-ah an la lang zui zel a, an sum lakluh a tlahniam mawh hle.
Bollywood film inlarna
June 29 khan Bollywood film chhuak thar a awm a, chu chu Sanju a ni. Ranbir Kapoor leh Sonam Kapoor te channa film hi North America lamah pawh a hit hle a, sum lalut hnem zual zingah a lang phak hial.
Box Office-ah hian Bollywood film ten dinhmun sang an luah phak meuh a, Sanju erawh top 10-ah a lang vang a ni. Kar liam ta chhung khan $mtd 2 a lalut a, pariatna a hauh a ni. Indian actress lar Anushka Sharma inlnna film hi India-ah phei chuan a hit rem rem hle a, tlangzarh aṭanga ni tam pawh a liam hmain vaibelchhe 145.41 a lalut tling der tawh a ni.
Sanju hian Hindi film chhuak tawh zinga ni khat thil thua sum lakluh tam lamah Baahubali 2 khumin, record ding lai a khum bawk a ni.
Box Office Top 10
1. Jurassic World: Fallen Kingdom - $mtd 60
2. Incredibles 2 - $mtd 46
3. Sicario: Day of the Soldado - $mtd 19
4. Uncle Drew - $mtd 15
5. Ocean's 8 - $mtd 8
6. Tag - $mtd 5
7. Deadpool 2 - $mtd 3
8. Sanju - $mtd 2.7
9. Solo: A Star Wars Story - $mtd 2.6
10. Won't You Be My Neighbor? - $mtd 2.4