Josephine Lalawmpuii music video thar Duhaisam 'D'

Ṭhazual Award-a Best New Artist atana thlan lo ni tawh, Josephine Lalawmpuii chuan music video thar 'Duhaisam 'D' tih chu a peihfel leh ta reng mai. Hei hi kumina a music video pathumna a ni.

'Duhaisam 'D' tih hla hi John Mawitea leh Mapuii Fanai te phuah niin, nula tlangval inngaihzawnna lam hla ṭha tak a ni. Music hi Lal K. Sailo siam a ni a, video hi Roar Media Production kut chhuak a ni thung. Music video hi Zonet local channel leh MDM YouTube channel-ahte en theih turin a awm thuai dawn.

Josephine Lalawmpuii hian kuminah music video pahnih - Ka tan ṭahna mai maw leh A kim mahna tih te a lo siam tawh a, Duhaisam D hi a pathumna chiah a ni. Music video hi 10 vel zet a tichhuak tawh a, tunah pawh hmachhawp eng emaw zat a nei bawk.

Zemabawk nula Josephine hi kum 2016 kha Ṭhazual Award-ah Best New Artist atan thlan a lo ni tawh a, lengzem singer ṭha ber pawl a ni chho mek. Ṭhazual chart-ah pawh a lang zing malh malh hle a, 'Ka tan ṭahna mai maw' tih hla pawh tunah hian top 10-ah a lang mek bawk.