Avengers 4 title tur a putru!

Avengers film hlawhtlin ṭhin zia kan hria a, tuna an siam thar leh tur Avengers 4 pawhin ngaihven a hlawh leh tawh hle. Hetiang a nih mek lai hian Avengers thar tur hi a title tur a putru nia tarlan a ni a, film siamtute lu a hai hle.

Avengers : Infinity War-a an cinema­tographer Trent Opaloch chuan tih palh thilah Avengers title thar tur 'Avengers: End Game' tih chu a tarlang a, siamṭha leh nghal mah se a darh hman ta tho a ni.

Canadian cinematographer hian website lamah Avengers: End Game tih hi a tarlang a, a tisual tih a hriat hnuah Avengers 4 tiin thlak leh nghal mah se awmzia a awm ta chuang lo a ni.

Opaloch hian kum 2014 aṭang khan Marvel Cinematic Universe-ah chanvo pawimawh tak a chelh chho a, Captain America : The Winter Soldier leh Civil War-ahte pawh khan hnuhma ṭha tak a lo hnut chhiah tawh a ni.

Avengers 4 hi kum 2019-a tlang­zarh tura ruahman a ni a, a title tur hi thlak a ni leh dawn em hriat a ni lo.