Mizoram's Got Talent 2021-ah Rindika'n talent a nei ṭha ber

Runmawi buatsaih, mipui hlut hlawh tak Mizoram's Got Talent 2021 chu Zirtawpni liam ta, November 26 zanah khan a hmawr bawk fel a ni ta a, Fingerstyle guitarist Lalrindika Zadeng chu pakhatna a ni.

D&E Auditorium, Hualngohmun-a buatsaih Mizoram's Got Talent 2021 final round-ah chuan contestant 14 an inel a, an zinga pali chu golden buzzer hmanga final lut niin midang 10 chu semi-final aṭanga thlan chhuah an ni thung.

Fingerstyle guitar a thiam em avanga social media lamah pawh hriat hlawh tak Rindika Zadeng, Chhinga Veng chu pakhatna niin Rs 3,00,000 a dawng. Rindika hi mipui vote lamah erawh pahnihna a ni a, Judge-te point pek nen belhkhawmin MGT 2021 winner a ni ta a ni.

Pahnihna chu Magician, magic show ropui leh hmuhnawm tak tak chhawp chhuaktu Ozaka Joute, Churachandpur a ni thung a; ani hian mipui vote a hmu hnem ber a ni. Ozaka hian Rs. 1,50,000 a dawng.

Pathumna chu zaithiam Samuel Lalhriatpuia Ralte, Kolasib a ni a, Rs 60,000 a dawng ve bawk.

MGT-ah hian talent nei ṭha tak tak an inlan tam a, judge- Lalnunkunga Sailo, Pensy B. Lalthangliani, Vanlalsailova leh Alan Rinawma te pawhin thlan thiam harsa an ti hial.

He show hi round ngaah ṭhen niin BD Chawngthu chuan a tir aṭangin zei takin a host a, Esther Sailo chu a co-host a ni. Zoram mipuiin he show hi an ngaihlu a, final a thlen dawn meuh chuan a boruak a lian hle.

October 4 aṭang khan he show hi ṭan niin Audition (Video Round) hmangin bul an ṭan a, heta screening paltlangte hian October 18-21 khan D&E Auditorium, Hualngohmun-ah live audition an nei a; a tawpa thlitfim mi 14-te result chu Zirtawpni liam ta zanah khan puan a ni ta a ni.