Grammy nomination list-ah Taylor Swift, Kanye West etc. an tel leh thut em ni?

New York Times-in Nilainia liam ta a an tarlan dan chuan Recording Academy-in hun tawp dawna Grammy category lian palia hming lang thei zat an tihpun leh thut avangin Taylor Swift, Kanye West leh artist dang ṭhenkhat lar tak takte hming chu heng huang ngaihven hlawhah hian an tel ve leh phah.

West leh Swift hi category dangah an hming lang tho mah se album of the year huanga 'Donda' leh 'Evermore'-te an lan theih phahna chhan chu hming lang thei zat an tihpun vang hi niin an tarlang a, hming langsar tak tak- Justin Bieber, Olivia Rodrigo, Tony Bennett and Lady Gaga, Doja Cat, H.E.R., Billie Eilish, Lil Nas X leh Jon Batiste-te nen he huangah hian an awmho theih phah niin an sawi.

Hetiang avang bawk hian Lil Nas X 'Montero (Call Me by Your Name)' leh ABBA 'I Still Have Faith in You'-te pawh record of the year category-ah an lan ve phah niin an tarlang cheu bawk a, Doja Cat 'Kiss Me More' leh Brandi Carlile 'Right on Time'-te pawh last minute-a telh chawp leh nia an sawi zingah an tel.

Times report hi a dik ngei em hriat ni lo mah se kum dangah chuan Big Four category – album, record, song of the year leh best new artist huangah hian hming pariat chiah an tlar ṭhina kuminah erawh 10 an lang ta thung a, nomination list an puan dawn ṭepa hming lang thei zat an tipung tak tak a nih chuan khawvela artist lar ber zinga mi Taylor Swift leh Kanye West-te hming pawh hi category lianah hian kan hmu lo ṭep niin a lang a, hei hian ngaihven pawh a hlawh zui viau.

Category lian paliah hian kum 2017 thleng kha chuan nomination list-ah panga chiah an lang ṭhin nghe nghe a, kum 2018 aṭang khan pariatah hian an titam chho a ni.

Hetihlai hian The Hollywood Reporter-in hemi chungchang an zawh chianaah hian Recording Academy president leh CEO Harvey Mason Jr. chuan Times report tihchhuah hi a pha thung a, kum eng emaw zat chu hemi chungchang hi an ngaihtuah tawh tih leh Swift leh West an belh leh thut nia report awmte chu a pha a ni.

Grammy 2022 hi nakkum January 31-ah sem a ni ang.