'Sanju' record a theuneu lo Vbch 200 lakluh thuai beisei

June 29-a tlangzarh 'Sanju' film hi kumina film chhuak tawh zingah chuan sumlakluh kawnga hlawhtling ber te zinga mi a ni. Tlangzarh nia sum lalut tam ber record a siam hnuah, tlangzarh aṭnga kar khat chhunga sum hailut hnem ber record a siam leh bawk.

Ranbir Kapoor leh Sonam Kapoor te channa film hian Nilaini thleng khan vaibelchhe 186.41 zet a lalut tawh a, tunah chuan vaibelchhe 200 a lalut tling tawh hial ang! Hei hi a namai lo hle a, Bollyood tan chuan chanchin lawmawm tak a ni ngei ang.

Hirani magic!
Indian film director lar Raj­kumar Hirani hi hre lo tam tak kan awm mai thei. Film hlawh­tling tak tak phenah hian mi tu emaw an aw ṭhin a, Hirani pawh hi chung zinga mi chu a ni.

A kut chhuak zingah PK leh 3 Idiots te chu inhrilh nawn pawh ngai lo khawpa lar an ni a, sum pawh an thawk chhuak hnem rem rem hle. Heng film siamtu bawk hian 'Sanju' hi a tichhuak a, beisei ang ngeiin a che ṭha zui. Tihchhuah ni la lain vaibelchhe 46.71 zet a lalut thei a, kar khat pawh a liam hmain vaibelchhe 200 dawn a lalut der tawh. Vawiin hi tlangzarh aṭanga kar khatna chiah a ni a, vaibelchhe 200 a tlin hman ngei a rinawm hle.

Sanju hian Salman Khan lehd Jacqueline Fernandez te channa 'Race 3' pawh a khum a, 'Baahubali 2' pawh a khum cheu bawk. Kumina tihchhuah tawh zingah vaibelchhe 100 lalut tling film paruk - Padmaavat, Sonu Ke Titu Ki Sweety, Raid, Baaghi 2, Raazi leh Race 3 te chiah an la awm a, chung zingah chuan Sanju hi hetiang zat sum thawk chhuak hma ber pawl a ni bawk.

A la tawp lo...
North America Box Office hi khawvelin film hlawhtling leh sum lalut hnem a tehna ber pakhat a ni a, chutah chuan Sanju pawh hi top 10-ah a lang phak. Kar liam ta khan North Amrica aṭang ringwt hian US dollar $mtd 2 zet a laut a, sum lalut hnem pariatna a ni. Hei hian India mai bakah Hollywood rorelna box office-ah pawh a nep bik loh zia chiang takin a pholang a ni.

Box Office-ah hian Bolly­wood film ten dinhmun sang an luah phak meuh lo a, Sanju a lan hnuah erawh thil a danglam ta a ni. He drama film-ah hian Ranbir Kapoor chu Indian actor lar Sanjay Dutt lemah a chang a, Sonam Kapoor nen an chang dun a ni.