Billboard Dance/Electronic Album chart-ah a vawi khat nan Marshmello-a'n No.1 a hauh
American music producer lar Marshmello chuan a vawi khat nan Billboard top dance/electronic album chart-ah No. 1 a hauh.
Khawvel huap pawha DJ lar ber pawl Marshmello hian June 22 khan a studio album pahnihna 'Joytime II' a tichhuak a, kar hnih lek hnuah No. 1 a nihpui nghal thei a ni. Joytime II hi electronic music huangah bik chuan album hralh kal ber a ni mek a, tlangzarh kar khan chart-ah hian No. 5 a hauh nghal a ni. A kar hnihnaah chuan tuma tluk rual a ni ta lo a, Marshmello tan bung thar kaina a ni ta a ni.
Joytime II albumah hian track pakua awmin, chung zinga pariat zet chu Billboard top dance/electronic song chart-ah an lang hial a ni. Hei hian electronic music huangah Marshmello ropui zia a tarlang a, dinhmun sang ber a luah pawh hi a inhmeh hle.
Dutch DJ Yellow Claw chu chart-ah hian pasarihna an ni a, hemi hma hian No. 3 an lo hauh tawh bawk. Top 10-a lang phak album pahnih - Los Amsterdam leh Blood for Mercy te an lo nei tawh a, Blood for Mercy hi 2015 khan No. 1 a lo ni tawh nghe nghe.
Hei bakah hian hot dance/electronic song chart-a lang phak track pahnih - Both of Us leh Summertime te an lo nei tawh bawk.