Gigi-i'n Serena leh Bella khaikhin!

American fashion model Gigi Hadid chuan a unaunu Bella Hadid chu fakin, tennis khawvela Serena Williams ang mai niin a sawi.

Gigi Hadid chuan fashion line-a Bella Hadid hlawhtlinna chu ropui a tih thu a sawi a, a dahsang hle. American magazine lar 'V' chuan tun hnai khan Gigi leh tennis superstar Serena Williams te hi an kawm a, Bella chungchang hi Gigi chuan chhuang takin a sawi chhuak a ni.

Kum 23 mi Gigi chuan, "Eizawnnaah hian kawng hrang hrang a awm a, mah­ni line ṭheuha hawh­tlingte hian fak an phu a ni. Bella Hadid hi a kawng zawhah chuan mi hlawhtling ber te zinga mi niin, Serena Williams-i'n tennis-a ro a rel ang mai hi a ni" tiin a nau chungchang hi a sawi.

"A kianga hun hman hi a nuam tak zet a, min tihlim hle a ni. Kan eizawnna kawngah kan indipdal ngai lo a, chawlh hahdam changa rawngbawltu zawk nih kan inchuh bak harsatna kan nei lo" tiin, an inkar a ṭhat thu a sawi thiam hle.

Hadid unau hi an naupan lai aṭanga sakawr chung chuang ṭhin an ni a, an puitlin hnu thlengin an ching zui. Gigi chuan, 'Fashion model kan ni a, shooting kan neih chang pawhin sakawr kan la tilang fo ṭhin. Hun remchang kan neih chuan sakawr chungah kan la chuang fo ṭhin," tiin, an naupan laia an thil chin chu an bansan theih loh thu a sawi bawk.