Iggy-i'n hla thar pahnih tichhuak

Australian rapper lar Iggy Azalea chuan thla khat vel zet thawm a neih tawh loh hnuah fan te a surprise a, Ningani khan a rualin hla thar pahnih a tichhuak.

A hla tihchhuah tur chungchang hi a hmain sawi rik a awm lo a, fan te beisei loh thil a thleng ta a ni. Iggy chuan, "Fan te hi ka tan chuan an hlu tak zet a, ka engkima engkim an ni. Hla thar chhawpchhuak sak hi an tana ka tih theih sang ber a ni tih ka hria a, ka puitlin thei hi ka lawm hle a ni" tiin fan te a ngaih­pawimawh thu a sawi.

Iggy hla thar hi 'Kream' leh 'Tokyo Snow Trip' tih a ni a, American hip-hop star Tyga a thawhpui a ni. Heng hla te hi ngaihthlak theih tura chhawpchhuah nghal niin, audio track hi YouTube lamah a awm tawh bawk. Aussie rapper hian album a buaipui mek bawk a, a cover tur pawh a lo tarlang tawh a ni. A hla thar pahnih pawh hi a album-a tel tur a nih a rinawm a, official music video erawh tihchhuah a la ni lo.