Mizo hranghlui zaithiam Laikunga Hmar a thi
Mizo zaithiam zinga hriat hlawh tak, Laikunga Hmar chu Ningani zanlai khan cancer natna avangin a thi a, nimin khan vui liam a ni. Amah hi kum 86 mi a ni.
Laikunga Hmar hi Mizo mipa zaithiam zinga radio artiste grade 'A' hmasa ber te zinga mi niin, hla chi hrang 100 chuang zet a dah a ni. A hla zingah hian 'Sensiari' tih leh 'Ka bang tawh ang' tih te chu mi hriat hlawh tak an ni.
A lar vanglaiin Culcutta-a Billy Graham-a team te rawngbawlna aṭangin a piangthar a, lengzem hla a sa duh ta lo a ni. A record sa pawh tihreh a dil a, hei erawh radio lamin an phal sak ta lo a ni.
A pianthar hnu hian gospel album pakhat a siam a, a fate pathum nen album an siam bawk.