Mystical Mizoram Ṭhazual Gospel ; Benjamin Colney leh Jerry Elaro Chart chung berah an ding

Mystical Mizoram Ṭhazual Gospel chart thar berah Ṭhazual Award vawi sarihnaa Best Duo Gospel award latu Benjamin Colney leh Jerry Elaro-te chu an hla hit 'Mak tak leh hlauhawm taka duan' hmangin chart topper an ni.

'Mak tak leh hlauhawm taka duan' a hit zel
Benjamin Colney leh Jerry Elaro-te an thawkdun fuh tak zet a, an hla tihchhuah dun 'Mak tak leh hlauhawm taka duan' pawh a hit chhunzawm zel.

He hla hi an tihchhuah aṭanga ni rei lo te chhungin mi nuai chuangin YouTube lamah an thlir nghal a, tunah hian an tihchhuah aṭangin thla hnih vel a liam tawh a, YouTube-ah thlirtu maktaduai 1.4 chuang zet an awm tawh. Kumin kum chawhnu lama Pathian fakna hla lar ber zingah a tel tih loh rual a ni lo.

Chumai a la ni lo, kar hnih liam taa sem Ṭhazual Award 2021-ah khan he hla hi live-in an sa a, chu video pawh chu YouTube lamah nuai thum chuangin an thlir leh tawh! He hla hian Ṭhazual Award pahnih lai a dawng bawk a, chart topper nih hi a phu veng vawng hle.

Chart hmasa lamah khan pathumna a ni a, tunah chuan pakhatna a rawn ni ta. Chart lehah an dinhmun ṭhaah hian an la din chhunzawm zel dawn em tih chu hriat chakawm tawh tak a ni.

Pahnihna leh Pathumna chu..
Pahnihna chu chart hmasa lama palina Sawmte Chhangte kha ni thungin 'Ka tan I hlu' hmangin pahnihna a ni. Stacy Punte pawhin hma sawn zelin 'Lalpa fakin' chu top 3-ah a rawn inhlankaipui ve ta bawk.

Chart-a lang an ṭha
Hlimhlimi 'Malsawm ruahpui' chu palina a ni a, Hlutei & Biaknii 'Min hruai rawh' chu pangana a ni thung.

Top 10-ah hian Maruati hla thar mawi tak 'Khum ka nuam' te, Jenn Ralte 'Beiseina' te, Melody hla thar 'Eng nge sual tleng fai thei ang' te, Valtea 'Zion-ah' te leh Thelma 'Ka damnna thisen' te pawh an lang a ni.

Ṭhazual Gospel top 10:-
1 Benjamin Colney ft Jerry Mak tak leh hlauhawm taka duan
2 Sawmtea Chhangte Ka tan I hlu
3 Stacy Punte Lalpa fakin
4 Hlimhlimi Malsawm ruahpui
5 Hlutei & Biaknii Min hruai rawh
6 Maruati Khum ka nuam
7 Jenn Ralte Beiseina
8 Melody Lalzirliani Enge sual tifai thei ang
9 K Ngaihliana (Valtea) Zion-ah
10 Thelma Lalhmingthangi Ka damna thisen