Stacy VL Muanpuii EP 'Lal Chawimawina- The Prelude' zaninah

Mizote'n Gospel singer kan neih ṭhat ber zinga mi Stacy VL Muanpuii chuan zanin hian Bluewave records kaltlangin 'Lal Chawimawina - The Prelude' EP a tichhuak dawn.

Stacy hian nakkum lamah hian album tlangzarh a tum a, chumi hmahruai atan chuan zanin hian hla pali awmna 'Lal Chawimawina- The Prelude' EP hi a tichhuak dawn a, audio streaming platform hrang hrangah ngaihthlak theih turin a chhawp chhuak dawn a ni.

Eddie Pachuau leh David L Ralte te hla 'A sawm che', J Vanlalhruaia hla phuah 'Min tlan ta', Lungmuana Chhangte leh Zothanpuia-te hla 'Kan hneh zel dawn' leh Andrew Laltlankima hla phuah 'Thlen ka nghakhlel' tihte chu 'Lal Chawimawina- The Prelude' EP-ah hian a awm ang.

Nizan lamah khan Zonet-ah a EP thar tura a hla dah pakhat 'A sawm che' music video chu thlira ngaihthlak theihin a chhawp chhuak tawh bawk a, MDM library lamah dahlut tawhin YouTube lamah pawh a awm thuai dawn a ni.