Paramore nakkumah an lo let dawn em ni?

Kum nga chhung lai chu American rock band Paramore chuan album thar an tichhuak tawh loa, live show pawh an nei tawh ngai lo. Mahse an vocalist Hayley Williams-i'n Zirtawpni liam taa social media lama thu post dan aṭang chuan nakkum lamah chuan rimawi khawvelah Paramore kan hmu leh mai thei.

A bandmate-te tel loa solo album pahnih tichhuak tawh Williams thuchhuah siam chu Twitter lama Paramore account-ah tarlan niin Williams chuan solo-a a kal chungchang sawiin, solo-a a kal chhung zawng pawhin a ṭhiante chuan an thlahthlam lo tih a sawi. A project-ah tel kher lo mah se an phurpui tih leh Paramore-a a bandmate-te nen chuan an inbe pawp reng tih a tarlang bawk a, Joey Howard tel lo phei chuan a album-te chu a awm pawh a rin loh hial thu a sawi.

A thuziah tawp lamah hian Paramore chuan kumkhuain chawlh an la thei lo tih ziak telin, 'Nakkum lamah kan inhmu dawn nia' tiin thu a titawp a, hei hi fan-te'n an bengkhawn hle. Kum 2022-ah chuan rimawi khawvelah Paramore an hmu leh ngei dawn niin an ngai a, media hrang hrang pawhin hemi chungchang hi an ngaihven hle a ni.