Thanksgiving Box Office-ah 'Encanto' che ṭha ber

Thanksgiving Box Office-ah 'Encanto' chu sum lalut tam ber a ni a, kar hmasa lama sum lalut tam ber 'Ghostbusters: Afterlife' chu pahnina a ni thung. Kar hmasa chhung khan film tlangzarh thar a awm nual bawk.

'Encanto' chu
Computer-animated musical fantasy comedy film 'Encanto' hi kar hmasa Nilaini khan theatre hrang hranga en theih tura tlangzarh a ni. He film siamna atan hian $maktaduai 120-150 vel lai an seng a, kar tawp liam ta chhung khan theatre 3,980-ah chhuah niin $27,206,494 lai sum a lalut.

He film-ah hian Stephanie Beatriz, María Cecilia Botero, John Leguizamo, Mauro Castillo, Jessica Darrow, Angie Cepeda, Carolina Gaitán, Diane Guerrero, leh Wilmer Valderrama-te chuan an aw thawhin critics lam pawhin he film hi an fak viau a, Rotten Tomatoes lamah chuan mi 121-in review-in rating 7.6/10 lai a hmu.

He film hian ram dang aṭangin $29,300,000 a lalut tawh a, North America aṭanga a sum lakuh tawh zawng zawng $40,567,273 tling tawh bawkin $69,867,273 lai sum a lalut tawh a ni.

Pahnihna chu kar hmasa lama sum lalut tam ber 'Ghostbusters: Afterlife' kha a ni a, kar tawp liam ta chhung khan $24,200,387 a lalut ve bawk.

Film thar che ṭha zualte
Biographical crime drama film 'House of Gucci' chu sum lalut tam pathumna a ni a, he film hi 'Alien' leh 'Gladiator' vela sulhnu ṭha tak hnutchhiah tawh Ridley Scott direct niin Lady Gaga channa a ni. He film chungchangah hian critics lam ngaihdan a inang lo hle a, chutih rual chuan Gaga chevel erawh an fak hlawm viau.

'Eternals' chu palina a la ni phak a, pangana chu film thar tho 'Resident Evil: Welcome to Raccoon City' a ni thung. He action horror film-ah hian Kaya Scodelario, Hannah John-Kamen, Robbie Amell leh Tom Hopper-te an chang a, Resident Evil live-action film pasarihna a ni.

Film thar dang
Licorice Pizza (13), For the Love of Money (16), Drive My Car (29), Writing with Fire (33) leh I Need You Dead! (37)-nate chu film thar an ni bawk. Box Office Mojo Chart-ah film 42 tarlan a ni a, chung zingah chuan film thar pariat lai a awm.

Box Office top 10:-
1 Encanto $27,206,494
2 Ghostbusters: Afterlife $24,200,387
3 House of Gucci $14,423,794
4 Eternals $7,925,905
5 Resident Evil: $5,319,280
Welcome to Raccoon City
6 Clifford the Big Red Dog $5,007,631
7 King Richard $3,272,353
8 Dune $2,080,111
9 No Time to Die $1,707,256
10 Venom: Let There Be Carnage $1,581,315