Twitter CEO aṭangin Jack Dorsey a bang ; Twitter CEO thar Parag Agrawal

Twitter co-founder leh chief executive officer Jack Dorsey chu Thawhṭanni khan social media giant CEO a nihna aṭangin a bang a, company board chuan inlungrual takin Twitter chief technology officer Parag Agrawal chu Dorsey thlaktu turin an ruat.

Kum 2015 aṭang khan Jack Dorsey hi Twitter CEO a ni tawh a, bang tawh mah se kum 2022 May thla thlengin board member a la nih chhunzawm dawn thung.

"Twitter ka chhuahsan tura thutlukna ka siam chhan chu he company hi a dintute tel loa kal zel turin a inpeih tawh nia ka hriat vang a ni.

"Twitter CEO atana Parag-ah hian rinna ka nghat thuk hle. Kum 10 liam ta chhunga a hnathawh chuan danglamna nasa tak a thlen a, a thiamna, a rilru leh thlarau zawng zawng avangin ka lawm hle a ni. A kaihhruai a hun ve tawh e," tiin Dorsey chuan a sawi.

Parag Agrawal chu...

Parag Agrawal hi kum 38 mi niin Indian-American a ni a, Twitter a zawm hma chuan Microsoft Research, Yahoo! Research, leh AT&T Labs-tante a thawk tawh ṭhin bawk.

IIT Bombay aṭangin B.Tech leh Computer Science degree a nei a, Stanford University, California-ah Computer Science-ah Ph.D a tih chhunzawm leh a ni.