UK-a classic album an stream tam ber Queen ‘Greatest Hits’

British mite chuan an 'Queen' chu an lo la ngaina reng e!

Queen rock band-in kum 1981-a an tihchhuah 'Greatest Hits' collection chu UK-a classic album stream tam ber a nih thu Official Charts Company data chuan a tarlang.

1970s, 1980s leh 1990s hunlaia album tlangzarh ho zawng zawngah Freddie Mercury leh a ṭhiante album hi UK mipuite chuan an stream nasa ber a, a dawtah chuan Fleetwood Mac-in kum 1977-a an tihchhuah 'Rumours' kha niin Oasis album 1995-a mi 'What’s The Story) Morning Glory?' chu pathumna a ni thung.

Queen ‘Greatest Hits’album hi khawvela album hralh kal ber pawl niin an band album hralh hnem ber pawh a ni a, ram hrang hrangah copy maktaduai 25 chuang an hralh tawh a ni. Nikum November thleng khan UK album chart-ah kar 900 zet a cham tawh nghe nghe a, UK bikah chuan vawi 22 platinum-ah puan a ni tawh bawk. US-ah vawi 9 platinum-ah puan a ni tawh a, kum 2018-a 'Bohemian Rhapsody' film tlangzarh a nih hnu khan he album hi a hit thar viau bawk.