Tom Holland 'Spider-Man' kan la hmu zel dawn

Marvel Cinematic Universe-ah Tom Holland chuan 'Spider-Man' lem a la chan chhunzawm zel dawn.

Kum nga liam ta chhunga 'Spider-Man' lema chang tawh, kum 25 mi Tom Holland hian a role pawimawh tak hi a la chan chhunzawm dawn tih producer Amy Pascal chuan a sawi a, Sony lam pawh Spider-Man film dang Tom Holland hoa siam leh turin an inpeih tawh a ni, a ti.

Fandango-in an kawmnaah hemi chungchang hi sawiin December thlaa tlangzarh tur 'Spider-Man: No Way Home' chu MCU Spider-Man film hnuhnung ber a la ni dawn lo tih sawiin,"Tom Holland leh Marvel thawhpuia Spider-Man film dang siam leh turin kan inpeih leh tawh a ni," tiin a sawi.

Amy Pascal chuan Sony leh Marvel-in Spider-Man chungchanga inkungkaihna an neih dan chungchang pawh sawiin ṭha takin company pahnih chu an thawk dun tih a sawi a, film siam dun chhunzawm zel pawh an duh tih a sawi bawk.

Hetihlai hian Tom Holland chuan hmanni lawk khan Spider-Man lema chan chhunzawm a tum tawh loh thu a lo sawi tawh a, kum 30 a tlina Spider-Man lema a la chang a nih ngat phei chuan thil eng emaw tih dik lo a nei hial nia a inngaih dawn thu a sawi tawh a ni.