Zaipawl inelna sang ber World Choir Games-ah Mizo Cardinal Choir

Khawvela zaipawl inelna sang ber World Choir Games-a tel turin Mizo Cardinal Choir te chuan nimin khan Mizoram an chhuah san a, South Africa an pan. Vawiin hian intihsiakna hmun tur Tshwane an thlen beisei a ni.

World Choir Games hi July 4-14 chhunga neih tur a ni a, Mizo Cardinal Choir hi final lut sa an nih avangin a tir lam an awl a, ni 13-ah an inlan dawn chauh avangin an kal har a ni. World Choir Games-ah hian a duh duh tel theih a ni lo a, World Cup football ang bawkin khawmualpui hrang hrang aiawh te chauh an inlan a ni.

Mizo Cardinal Choir hi nikum November thla khan Sri Lanka khawpui Colombo-ah Asia-Pacific Choir Games-ah an champion avangin an tel thei a ni. An tel thei mai ni lovin khawmualpui champion an nih avangin final hi an lut sa a ni.

World Choir Games-ah hian India ram aṭangin zaipawl an la tel ngai lo nia hriat a ni a, Asia-Pacific Choir Games-ah pawh Mizo Cardical Choir bak India ram aṭanga champion an la awm lo a ni.

India leh khawvel huap pawha zaipawl lar Shillong Chamber Choir te chu Asia-Pacific Choir Games-ah hian an lo tel tawh a, mahse an champion zo lo a ni.

India ram aiawhtu Mizo Cardinal Choir-ah hian member 18 an awm mek a, choir ranking-ah India No.1 an ni. World Choir Games-ah hian hla pali sak an tum a, an elpui turte hi khawvel huapa lar an nih hlawm avangin ṭawngṭaipui turin Mizo mipui an ngen a ni. Khawvel huapa zaipawl intihsiakna lianbera an tel theih nana hmalakpuitu Mizoram sorkar, Art & Culture leh Finance Deparment chungah lawmthu an sawi bawk.