FIFA president Infantino-a'n Tham Luang puka tangte World Cup final en turin a sawm!

FIFA president Gianni Infan­tino chuan Thailand-a Wild Boar soccer team leh an coach, Tham Luang puka tang mek te chu world Cup final en turin a sawm. Infantino hian kar kalta Niangani khan Thailand Football Association hnenah sawmna hi a thawn a, a tawrhpui thu a tarlang bawk. Player 12 leh an coach te hi June 23 aṭang khan tuilian avangin puk-ah hian an ṭang a, chhanchhuah hna thawh mek a ni. Naupang ṭhenkhat chu lakchhuah an ni tawh a, puk chhunga la tang mek an awm bawk.

FIFA president chuan heng mite hi a tawrhpui thu sawiin, July 15-a khelh tur World Cup final an en ve theih ngei a duhsak thu a sawi.

Infantino chuan, "Wild Boar soccer team leh an coach te hi an chhungte nen dam taka an inhmuh leh ngei kan duh a, World Cup final en turin Mos­cow-ah lo tel ve ngei se ka duh tak zet bawk a ni" tiin a sawi.

"FIFA chuan a hmun ngeiah he intihsiakna hmawrbawkna hi min telpui se kan duh a, a rawn tel thei a nih chuan kan lawm hle ang" a ti bawk.

England defender John Stones, Japan World Cup team, Brazil legend Ronaldo, Liverpool manager Jurgen Klopp te chuan thlawpna thu an sawi ve tawh bawk. Anni bak hian Croatian Football Federation chuan an thlawp thu an sawi tawh a, foot­bal fans eng emaw zat chuan World Cup trophy chu Wild Boar soccer team leh an coach te hian an chawi ve ngei se an duh thu an lo sawi ve mek bawk!

World Cup final-ah hian Korean boy band lar EXO chu an perform dawn nia tarlan a ni.