Adele, Adele leh Adele bawk

Tunkar Billboard Chart chu Adele tana ruat a ni ringawt. Billboard 200 chart, Hot 100 chart leh Artist 100 chart-ah roreltu a ni a, chumai a la ni lo, Billboard chart dang neuh neuh eng emaw zatah chart topper a ni bawk.

Kumin chhunga Album ropui ber '30'
British singer Adele hian November 19 khan a studio album palina '30' a tlangzarh a, rinlawk ang ngeiin a ropui narawh e. Kumin chhungin artist lar tak tak- Taylor Swift, Drake leh Kanye West-te pawhin album tlangzarh ve bawk mah se Adele ang em em hi chuan an album a hit ve lo.

Adele album thar ber hi a tlangzarh ni aṭanga ni thum lekah khan kumin chhunga US-a album hralh hnem ber a ni nghal der a, ani ang em ema album hralh thei hi kumin chhungin an awm lo.

MRC Data-in a tarlan dan chuan Adele hian US-ah equivalent album unit 6,60,000 a hmu chhuak a, Drake-a'n kumin atana EAU hmu tam ber record 'Certified Lover Boy' hmanga a lo siam tawh chu a khum. Drake khan 6,13,000 a hmu a ni.

Chumai a la ni lo, mi tam tak chu an album streaming platform leh radio vela an play tam avangin EAU hi a sang ṭhin a, mahse Adele chu a ni ve lo. Album sales aṭangin 5,60,000 lai a hmu chhuak niin an tarlang a, kumin chhunga US-a album hralh tam ber Taylor Swift 'Red (Taylor’s Version)' chu a khum chiang hle bawk. Swift khan copy 3,69,000 a album tlangzarh karah khan a hralh.

Adele hian album pathum lai Billboard 200 chart topper a nihpui ta a, 25 leh 21 kha a hmain a lo nihpui tawh a ni.

Billboard 200 chart lamah chuan kar hmasa lama pakhatna 'Red (Taylor’s Version)' chu pahnihna a ni thung a, Drake 'Certified Lover Boy' chu pathumna a ni ve bawk.

Hot 100-ah pawh Adele bawk
Adele chuan '30' album aṭanga single-a a tihchhuah 'Easy on Me' chu chart topper a nihpui leh tawh. He hla hi kar eng emaw zat chu Hot 100 chart-ah hian topper a nihpui tawh a, kar hmasa lamah khan pahnihna ni zuaiin tunah chuan pakhatna a ni leh tawh.

He chart-ah hian The Kid LAROI & Justin Bieber "Stay' chu pahnihna a la ni ve bawk.

Chart dangah pawh Adele zel
Billboard Global 200 chart lamah pawh 'Adele Easy on Me' hi pakhatna a ni a, Artist 100 chart-ah Adele hi pakhatna a ni bawk. Billboard Streaming Songs chart, Radio Songs Chart, Top Current Album Sales chart leh Vinyl Album chart lamah pawh Adele hi pakhatna a ni vek.

Billboard 200 chart top 10:-
1 30 Adele
2 Red (Taylor's Version) Taylor Swift
3 Certified Lover Boy Drake
4 An Evening With Silk Sonic Silk Sonic
(Bruno Mars & Anderson .Paak)
5 Dangerous: The Double Album Morgan Wallen
6 Still Over It Summer Walker
7 Raise The Roof Robert Plant / Alison Krauss
8 Sour Olivia Rodrigo
9 Christmas Michael Buble
10 The Highlights The Weeknd

Hot 100 top 5:-
1 Easy On Me Adele
2 Stay The Kid LAROI & Justin Bieber
3 Industry Baby Lil Nas X & Jack Harlow
4 All Too Well (Taylor's Version) Taylor Swift
5 Oh My God Adele