K-Pop 2018 India ; Grand finale-ah Mizo che ṭha

K-pop 2018 India grand finale chu July 9, Thawhṭanni zan khan New Delhi-ah zawh fel a ni a, Mizoram aṭanga tel te an che ṭha hle.

Mizoram round-a winner te chu grand finale-ah hian an inlan a, Juchy chu vocal category-ah pakhatna niin, Hormonic Boyz te chuan dance category-ah Pathumna an hauh bawk.

Hormonic Boyz te hian prize money Rs. 42,000 leh lawmman dang an dawng a, Juchy hian free trip to Korea a hlawhchhuak ve thung. Juchy hi nikum khan pahnihna a lo ni tawh bawk a, Korea-ah a thlawnin a zin a ni.

Juchy hian Changwon World K-pop festival-ah nomination a hmu bawk a, ram hrang hrang aṭanga a ṭha zual thlanchhuah mi 12 zingah a tel leh a nih chuan festival-ah hian India ai a awh thei dawn a ni.