GRACE 2021 Gospel Music Festival Zanin dar 8-ah

Zanin dar 8-ah hian Gospel Music Festival puitham tak, GRACE 2021 chu Vaivakawn Cultural Centre & Auditorium-ah buatsaih a ni dawn a, hripui leng vangin a hmunah mipuiin a chhim theih dawn loh avangin Local channel LPS 1 leh ZONET Zawlbuk-ahte Live a pekchhuah a ni dawn a, chubakah chuan Zonet YouTube channel lamah live-a pek chhuah a ni dawn bawk.

Grace 2021-ah hian Gospel Artist ṭha tak tak leh tunlaia huhang ngah ber berte an inlan dawn a, musician pawh an ṭha dawn. Upa C. Ngurthantluanga chuan he Festival thupui 'Grace 2021' thuchhah tawi a sawi dawn bawk a ni.

He Gospel Music Festival atan hian hun rei tawh tak aṭang khan inbuatsaihna ṭha taka kalpui a ni tawh a, rehearsal pawh tum hnih zet an nei tawh. Chuvang chuan show hlawhtling tak a ni ang tih a rinawm sa.

Mizoram Concert neih tawh a mipui tamna ber ni hial, KTP Gen. Conference Jubilee Concert bakah Ṭhazual Award pawh hneh taka lo kaihruai tawhtu Zonuni chu host a ni dawn a, Gospel Band thar Altar Call-te chuan show an hawng dawn a ni.

He Gospel Music Festival hi Active Sound-te'n Light and Sound an buaipui dawn a, Video Coverage chu Basanta-te'n an buaipui dawn thung. Musical Instrument lama company lar em em mai Roland-in an sponsor dawn a, anni bakah hian tualchhung mi ṭhahnemngai tam takte'n an pui bawk a ni.

Inlan turte an hrawl dawn
MZI Raimawi Award 2021 a Artist of the Decade dawngtu, zaithiam chuai thei lo Vanlalsailova a inlan dawn a, Ṭhazual Award Gospel singer of the year dawngtu Maruati pawh kan hmu dawn bawk. Anni pahnih inlan tur ringawt pawh hi show enna tham a tling.

Israel Pachuau, Fiona leh Mawitei bakah Henry leh Nunui Duet kan ngaithla dawn a, Andrew, Arini, Cindy leh BOG pawh inlan tur zingah an la awm cheu. Tin, Mizoram Live Concert a kan la hmuh ngai loh Roland Grand Piano chhawp a ni dawn a, he Grand Piano hmang hian Stacy-i'n ‘Khawngaihna mak mawi leh duhawm’ tih hla a sa dawn a, thlira ngaihthlak a manhla dawn.

Zorema leh Jonathan Lianhna-te kan hria, anni pawh zaninah hian an inlan dawn a, Hlimhlimi’n a rawn chhunnzawm bawk ang. Ṭhazual Award 2021 pahnih lai la tu Jerry leh Benjamin Colney te chuan an hla hit ‘Mak tak leh hlauhawm taka duan’ an rawn sa dawn bawk. Rock music lam ngaina tan Gospel band Bee 31 leh Swordtune-te'n hun an hmang dawn bawk a, zanin na na na hi chu Pathian fakna hla ngainatute tan chuan khawdang hawi chi a ni lo ang.

GRACE 2021 Gospel Music Festival hi Kohhran hrang hrang inpumkhatna tura buatsaih a ni a, chuvang chuan artist leh musician inlan turte pawh Kohhran hrang hranga mi an ni dawn. Ṭhalaite chu he show buatsaihtute tinzawn ber niin kumdangah pawh buatsaih chhunzawm zel an tum a ni.