Young Fella featuring Various Artist 'Volleyball Mizoram' zaninah tlangzarh dawn

Tunlai Mizo rapper zinga thawm nei ring ber pawl Young Fella chuan zaithiam hrang hrang thawhpuiin zanin hian hla thar 'Volleyball Mizoram' a tlangzarh dawn.

A hla tihchhuah apiang a hit emaw tihmai tur, huhang ngah leh ṭhalaite ngaihzawn rawn Young Fella hla thar hi MVA Volleyball Nite, Hotel Regency Bunker-a neih turah tlangzarh a ni dawn a, Volleyball Nite 2021 hi zirtawpni zan dar 8:00 a ṭan tùr niin, LPS-10 ah Live telecast a ni ang,.

Young Fella hla thar hi Mapuii, H. Vanlalngura, Marina V. Varte leh Roma Hmar te'n zaipuiin, Young Fella feat. Various Artist tih a ni a, he hla hi David Zochhuanmawia (Vida Hrahsel Saza) phuah niin a thlûk pawh a siam nghal a, Mizoram Volleyball Association present a ni thung.

Video chu Remruata Billywaif kutchhuak a ni a, a hmuhnawm dawn. Music & recording chu tunlaia rûl avanga lâr em em Roma Hmar & Co. kutchhuak niin, 'Rokunga Rimawi Tuk Rûn' kut chhuak a ni a; Rap bik hi Smiley Records, Ramhlun Venglaia a tih a ni.

'Zing dar 6' leh 'Rukru' hit maker Young Fella hla thar tur hi a nghahhlelhawm tawh viau. MZI Best Rapper 2021 award a lakpuina 'Zing dar 6' phei chuan tunah hian YouTube-ah thlirtu maktaduai nga chuang a nei tawh a, 'Rukru' pawh khan mtd chuang thlirtu a nei leh der tawh. Tuna a hla thar tihchhuah tur pawh hi a 'hit' leh turah beisei ang.

Mizoram Volleyball Association chuan Volleyball hla thar nei ngei tùrin ṭan a la a, Dr. Lalmalsawma Nghaka, D-3 Business Enterprise neitupain he Music Video hi a sponsor a ni. Thawhpuiah Young Fella chu sawmin, Mizoram Volleyball Association chuan nasa takin hma a la a, Fella nen thawhhona ṭha tak neiin, thawhho zel pawh an la tum bawk a ni.