Kumin chhungin album an stream nasat ber SOUR
Music streaming service Spotify chuan Nilaini khan an streaming service kaltlanga hla, album, artist, podcast leh thil hrang hrang an stream nasat zual an tarlang a, Olivia Rodrigo album hmasa ber 'SOUR' chu kumin chhunga Spotify-a album stream tam ber a ni.
Olivia Rodrigo tana kum ṭha a la ni zel
Khawvela hriata a inpho chhuah kumah Olivia Rodrigo chuan lawm a la hlawh chhunzawm zel e.
A album 'Sour' chu khawvel puma Spotify-a album stream tam ber a ni a, Dua Lipa 'Future Nostalgia' chuan dawtin Justin Bieber 'Justice' chu pathumna a ni thung.
Olivia Rodrigo hi album lamah chauh a che ṭha lo, rimawi khawvel a runna hla 'drivers license' chu kumin chhunga hla stream tam ber a ni bawk a, vawi tluklehdingawn 1.1 chuang an stream der tawh.
Lil Nas X 'MONTERO (Call Me By Your Name)' chu hla stream tam ber dawttu niin Billboard Hot 100 lama tlahniam hleithei lo The Kid LAROI & Justin Bieber 'Stay' chu pathumna a ni bawk.
Zai an stream tam ber chu Bad Bunny
Puerto Rican Reggaeton star Bad Bunny chu Spotify-a artist an stream tam ber a ni thung a, nikum lamah pawh khan he dinhmunah hian a lo ding tawh bawk. Bad Bunny zai hi kumin chhung hian vawi tld 9.1 zet zu han stream tawh a!
Bad Bunny dawtah hian Taylor Swift a awm a, BTS chu pathumna niin Drake leh Justin Bieber-te'n an dawt a ni.
Justin Bieber hming a lang zel
Spotify Most Streamed Albums Globally, Most Streamed Artist Globally leh Most Streamed Songs Globally-ahte hian Justin Bieber hming hmuh tur a awm vek.
Most Streamed Albums Globally-ah chuan a album 'Justice' chu pathumna a ni a, Most Streamed Artist Globally-ah pangana a ni phak a, Most Streamed Songs Globally-ah chuan The Kid Laroi nena an thawhdunna hla 'Stay' chu pathumna a ni ve leh bawk a ni.
Podcast Spotify hmangtute'n an ngaihthlak tam ber chu The Joe Rogan Experience a ni thung.
Spotify Most Streamed Albums Globally:-
1 SOUR Olivia Rodrigo
2 Future Nostalgia Dua Lipa
3 Justice Justin Bieber
Most Streamed Artist Globally
1 Bad Bunny
2 Taylor Swift
3 BTS
Most Streamed Songs Globally
1 drivers license Olivia Rodrigo
2 MONTERO Lil Nas X
(Call Me By Your Name)
3 Stay The Kid LAROI
ft Justin Bieber