#BoycottChhapaak campaign-in nuihzat a hlawh

Bollywood superstar Deepika Padukone-i'n Thawhlehni zana Jawaharlal Nehru University campus a tlawh chu BJP leh Hindutva thlawptute chuan an duh lo hle a, social media lamah a film channa tlangzarh mai tur Chhapaak boycott-na tur campaign an nei a; an campaign dan erawhin nuihzat a hlawh hle.

Chhapaak boycott-na tur campaign-a twitter-a an troll darhah screenshot pakhat, mi pakhatin a cancel-na chu an lo hmang kual vel mai mai tih hmuchhuah a ni. #boycottchhapaak campaign-ah hian BJP IT cell chuan booking pakhat kha an cancel nawn leh vel nia sawiin Twitter  lamah fiamthu thawhna atan an hmang.

JNU campus-a misual hmaituam lutte hi BJP zir­lai pawl ABVP-te nia puh a ni a, ABVP lam hian pha hle mah se media ṭhenkhat chuan an ni ngei a ni tih finfiahna a ṭha hle niin an tarlang thung. Pawikhawihna thlenna tur WhatsApp message an chhui let pawhin ABVP mem­ber number-ah an chhui lut tih scroll.in chuan a tarlang. 

JNU a tlawh avanga social media lama titi siamtu,  Deepika Padukone channa Chhapaak hi vawiinah tlang­zarh a ni dawn.

He film hi a taka thil thleng, acid hmanga beih Laxmi Agarwal chan­chin behchhana siam a ni a, Deepika hi Vikrant Massey nen an chang dun. JNU campus-a Deepika in­lan pawh hi BJP thlawptu lam chuan a film thar tihchhuah tur tihlar tumah an puh thung. Hetihlai hian Madhya Pradesh chief minister leh Chhatisgarh chief minister-te chuan Chhapaak film chhuahnaah hian chhiah an lâk loh tur thu an puang - hei hi 'acid attack' chungchang inzirtirna lama hmalakna atana an tih a ni.