Billboard Year End Chart Kum 2021 Dua Lipa ‘Levitating’ tan

Billboard Year End Chart a chhuak a, Dua Lipa ‘Levitating’ chu kumin Billboard Hot 100 Song of the Year-ah puan a ni. Canadian rapper Drake chu a kum zawnin Artist of the Year a ni leh bawk.

‘Levitating’ chu
‘Levitating’ hi Dua Lipa 'Future Nostalgia' album-a mi kha niin nikum October 17 khan a vawi khatna atan Billboard Hot 100 chart-ah pakhatna a ni a, kumin chhung hian Hot 100 top 40-ah lang char charin kar 41 lai chu top 10-ah a lang hial! Hei hi hmeichhe artist zingah chuan record a ni bawk.

"Hrileng karah lehnghal, rim taka thawh hnua hetiang dinhmun thlen hi a lawmawm. Ka tan chuan a hlu tak zet. ‘Levitating’-in Billboard chart-a hetiang a thleng hi a awihawm lo hle zawk," tiin Dua Lipa chuan a sawi.

2021 year-end Billboard Global 200, Streaming Songs, Radio Songs, Pop Airplay, Adult Pop Airplay leh Billboard Canadian Hot 100 chart-ahte pawh 'Levitating' hi pakhatna a ni vek.

The Weeknd & Ariana Grande 'Save Your Tears' chu Billboard Hot 100 Song of the Year-ah hian pahnihna a ni thung a, pathumna pawh The Weeknd hla bawk 'Blinding Lights' kha a ni.

■ Billboard Year End Chart siam tur hian Nov. 21, 2020 leh Nov. 13, 2021 inkara chart hrang hranga che ṭhate an en.

A ropuina Billboard tualzawlah Drake a ropui
Canadian rapper chu Billboard Top Artist of the Year-ah puan a ni leh ta. Nikum lam pawh khan he dinhmunah hian a lo ding tawh a, a kum zawnin Billboard’s Top Artist of the Year a ni ta der mai.

Chumai a la ni lo, Drake hi kuminah hian Male Artist of the Year-ah thlan a ni leh bawk. Billboard Male Artist of the Year hi vawi nga lai a ni tawh.

Kum 35 mi Drake hian kumin hian 'Certified Lover Boy' album a tichhuak a, he album hi a hlawhtlinpui leh rem rem hle a, Hot 100 chart lamah pawh he album-a hlate hi an che ṭha hlawm hle a, a tlangzarh aṭanga kar khatnaa Hot 100 chart top 10 phei chu a hla deuh vek a ni.

Olivia Rodrigo pawh a langsar zel e, chutin BTS pawh
American tleirawl Olivia Rodrigo chu Billboard Female Top Artist of the Year a ni a, Top New Artist chart-ah pawh pakhatna a ni.

Korean Superstar BTS chu Top Artists – Duo/Group chart-ah pakhatna an ni a, group leh duo lar tak tak kharah BTS chu he chart-a roreltu hi an ni. Billboard 200 Album Year End Chart-ah chuan kumin chhunga album hit tak Morgan Wallen 'Dangerous: The Double Album' kha pakhatna a ni thung a, pahnihna chu Olivia Rodrigo 'Sour' kha a ni thung.

Billboard Year End chart-a pakhatna ni thei ṭhenkhat:-
Top Artists Drake
Top New Artists Olivia Rodrigo
Top Artists- Duo/Group BTS
Top Artists- Male Drake
Top Artists- Female Olivia Rodrigo
Hot 100 Songs Levitating Dua Lipa
Billboard 200 Albums Dangerous: The Double Album - Morgan Wallen