Billboard 200 Album Chart ; Kum 29 hnuah Guns N' Roses' inlar leh ta Drake-a'n Taylor Swift record hnaih zel
American hard rock band lar Guns N' Roses chu Billboard 200 Album chart-ah an inlar leh ta a, kum 29 zet liam hnuah a vawi khat nan top 10 huangah an inhlangkai. Hetih lai hian Drake pawhin Billboard Artist 100 chart-ah a vawi 27 nan No.1 a hauh leh ta a, Taylor Swift record a hnaih zel.
Khawvela rock band lar ber pawl Guns N' Roses hian an lo ropui tawh ṭhinna chu chhawm nungin, boruak an nei lian thar leh mek. An debut album 'Appetite for Destruction' chu tun lai hian North America lamah hralh a kal thar leh a, chart-ah 10-na a hauh phak a ni. He album hi kum 1987-a tichhuah niin, Billboard Album chart-ah pawh hian No. 1 a lo hauh tawh ṭhin a ni. Kum 30 dawn a vei hnuah pawh album hralh kal ber zinga mi a la ni fan.
Guns N' Roses hian tun hnai khan an album hi tuaithar lehin an tichhuak a, track khawih danglam leh belh thar eng emaw zat a awm. Hei hi an band ngaisangtu leh an zai ngainatu ten hriain an album lei an intih hmuh a, hralh pawh a kal hle a ni. Guns N' Roses hi Billboard 200 Album chart top 10-a an lan hnuhnung ber chu April 15, 1989 daih tawh kha a ni.
Drake leh record
Canadian rapper Drake hian mi bik a nih zia a lo pholang fo tawh ṭhin a, chu chu a record en pawhin thil chiang tak a ni. Drake hi Billboard Artist 100 chart-ah palina aṭangin a chung berah a invawrh chho a, No.1 ṭum 27 zet hauhna a ni ta. Kar 27 zet dinhmun sang ber luah hi thil namai lo tak a ni a, mi bik te chauh tih theih a ni.
Hetih lai hian Drake hian tluk loh a la nei cheu a, chu chu American singer Taylor Swift a ni. Swift hian Billboard Artist 100 chart-ah hian kar 36 chhung zet chu No.1 a lo hauh tawh a, Drake hi a record hnaihtu awm chhun a ni. Taylor Swift record khum tur hian Canadian rapper hmabak hi a la ko hle a, chutih rual chuan a kal dan enin thil theih loh erawh a ni lo tih a lang.
Canadian singer The Weeknd, Justin Bieber, Ed Sheeran leh English singer Adele te chu record nei ṭha zingah an tel bawk.