Closing ceremony-a perform tur Korean boy band EXO & BTS

Khawvel ennawm ropui ber FIFA World CUP 2018 final chu July 15 khian Luzhniki Stadium, Moscow-ah khelh a ni dawn a, he hunah hian Korean boy band EXO leh BTS te chu an perform dawn nia tarlan a ni.

K-pop boruak a lian a, chu chuan khawvel a deng chhuak hneh hle. World Cup final meuha inlan tur chuan beisei ngam an harsa a, mahse anni aia phu an lo awm chuang lo. Korean boy band lar pahnih te perform hi khawvelin a hmuh chak ber a ni tlat!

Engtin nge a nih theih?

International Federation of Association Football (FIFA) chuan July 4 khan poll a buatsaih a, darkat 24 chhung vote thlakna hun hawn a ni. Social media kal tlanga vote thlak a nih hnuah Korean boy band te hian World Cup closing ceremony-a inlan tura duhtu an ngah ber a ni.

Twitter leh Instagram lamah poll hi buatsaih niin, Twitter bikah hian EXO chuan vote an hmu hnem ber. Vote thlaktute hian EXO hla hit 'Power' ngaihthlak an chak ber a, BTS hla thulkhung 'Fake Love' chu Insagram lama vote thlaktute duh thlan a ni thung. Luzhniki Stadium chhunga football fan rual zaia awi tur hian Korean boy band te hian duhtu an ngah ber a, mumangah pawh an la hmuh ngai loh ram an dai dawn ta a ni.

Vote thlaktute duh ang ngeiin EXO hian 'Power' hi an perform dawn a, BTS chuan 'Fake Love' an sa dawn bawk niin media chuan an tarlang a, media hrang hrangin an tarlan dan inang lo mah se Korean boy band te hi an perform ngei a rinawm.

Vote laknaah hian Colombian singer J Balvin leh German-Rus­sian record producer lar Zedd te chu an langsar viau bawk. Darkar 24 chhung hian vote maktaduai 3.2 chuang zet tlain, K-pop lam hian 48% zet an hui a ni.

World Cup khelh meka FIFA social media manager, Alex Stone chuan closing ceremony-a EXO leh BTS inlan tur thu a puang tawh a, fan te tan chuan a ngahhlehawm tawh khawp ang le.

He tih lai hian media hrang hrangte tarlan dan a inang lo nual a, American pop rock band Imagine Dragons hla 'Thunders' leh British rock band Queen hla hit 'We Will Rock You' tih te chu stadium chhungah hian play a ni dawn bawk niin an tarlang.

Beisei a sang

June 14 khan 'Greatest Show on Earth' hi khuhhawn a ni a, opening ceremony hian darkar chanve a awh. Ṭum dang angin a boruak a 'hot' tawk lo a, a ropui tawk lo bawk, tih chu duhkhawp lo tute selna ṭawngkam a ni.

Opening ceremony-ah hian English singer Robbie William a inlan a, a chet dan avangin sawi­selna a tawk zui nasa viau bawk. Moscow khawpuia a kharna neih leh turah erawh beiseina a sang a, football fan ten an duh leh beisei an hmu dawn em tih chu Pathianni zanah a hriat dawn. Mi 80,000 chuang lenna Luzhniki Stadium-a Korean boy band EXO leh BTS che vel hmuh a chawk tawh hle a ni.