Resident Evil series hralh a kal
Japanese video game developer Capcom chuan Resident Evil series game an siam chu khawvel pumah unit maktaduai 100 chuang an hralh tawh tih an sawi.
Capcom hian kum 1996 aṭang kha Resident Evil franchise hi an siam ṭan a, he survival horror game an siam hi game tam tak an siam zinga unit maktaduai 100 chuang an hralh theih hmasa ber a ni.
Resident Evil franchise hi a thar a awm leh dawn a, Capcom chuan Resident Evil Village tiin a title an phuah tih pawh tarlang tawhin trailer pawh an dah chhuak tawh bawk.
Resident Evil series game an hralhna zawng zawnga 80% hi chu Japan pawn lama an hralh a ni thung a, gaming console hrang hrang leh PC-a khelh theih turin an game-te hi an tichhuak ṭhin.
Capcom chuan kum 2017-a an tlangzarh Resident Evil 7 Biohazard kha unit maktaduai 7.5 an hralh tih an sawi a, he game pawh hi PlayStation 4, Xbox One, Windows PC leh Nintendo Switch-ahte a khelh thei a ni.
Resident Evil Village hi nakkuma tlangzarh hman an tum a, PlayStation 5, Xbox Series X leh PC-a khelh theih turin an tichhuak hmasa phawt ang.