Hranghlui zaithiam Ngurliana Sailo kan chán ta

'Darbiahnemi' tih hla hmanga Zofate min awitu Ngurliana Sailo chu nimin zingah khan Covid-19 vangin Zoram Medical College, Falkawn-ah a boral a, nimin vek chawnu dar 2:30-ah khan Lalluaia Hall, Reiekah vui a ni.

Ngurliana Sailo hi November 30, 1911 khan Reiek khuaah piangin a pa chu Laltluanga Sailo a ni a, Reiek Lal hnuhnung ber a ni nghe nghe. A nu hming chu Lalsangliani Sailo (Biate Lal fanu) a ni thung.

Unau panga zinga a mi lai niin, hla phuah bakah rimawi leh zai lamah a tui hle a, kum 1966 velah khan hla phuah ṭan tawhin Lengzem hla 20 vel a phuah hman. A hla phuah hmasak ber chu ‘Phu loh lengi' tih a ni.

1970's chhoah khan Zoram pumah a zai thiam avangin a lar hle ṭhin a, ‘Ka hlimna leh ka lawmna ber’ (1970), ‘ST Mangtha’ (1978) tih leh ‘Beisena’ tih te chu lar zual niin a hla phuah zingah chuan ‘Darbiahnemi’ tih chu a lar ber pawl a ni bawk.

Kum 1971 aṭang khan All India Radio Station-ah hla record ṭanin hla 60 vel lai radio-ah hian a thun hman a, Top Artist (B high) a ni hial. Album pakhat ‘Darbiahnemi’ siamin kum 2003 khan a tlangzarh a ni.

Ngurliana Sailo hi hun eng emaw chen chu Zunthlum natnain a tibuai tawh a, he natna hian a mit a khawih avangin phai lamahte pawh vawi eng emaw zat an kal tawh a ni. October thla khan a mit fiah loh zual avangin Aizawl lamah inentirin an kal a, chumi an haw leh chuan Covid-19 a kai tih hmuh chhuah niin November 11 khan 3C-ah a lut a, hma a sawn theih loh avangin November 26 khan DCHC Mualpui-ah dahluh leh niin Oxygen te pek a ni a. A din hmun a ṭhat loh deuh avangin November 27 khan ZMC-ah phurh phei niin ICU-ah an dah nghal a, nimin zing dar 7:30 khan chatuan ram a pan ta a ni.