CALL 112 a biak theih ṭep ; A theih veleh i dial dawn nia, i inchhir lo ang

Lersia Play Original Movie 'CALL 112' chu Inrinni liam ta zanah khan Vanapa Hall-ah premiere a ni a, Dr Vanlalṭanpuia, MLA, MYC Chairman ni bawk chuan he film hi a tlangzarh a ni.

Mizo film thar 'CALL 112' hi Lersia Play kaltlangin pawisa tlemte chauh chawiin a en theih thuai dawn a, he film 'Premiere'-naa kalte chuan hmuhnawm an tih thu bak sawi tur an hre meuh lo.

Mizo film industry-in hma a sawn zel a, Mizo film ṭha tak tak a chhuak chho zel dawn niin a lang. Mizo film thar ber 'CALL 112' hi kan film industry hmasawnna lantirtu pakhat pawh a ni chiang hle.

A tir lamah englam hawi nge a nih dawn hriatthiam mai a har a, ṭhenkhat tan chuan a 'boring' hman ṭep mai thei. Mizo film siamtute leh script ziaktute hmasawn ngaihna pawh heilai ni niin a lang. Tunhnai Mizo film thar ho hi a tir aṭanga ṭang nghal at a tam loa, a hmuhnawmna lai hai chhuak turin minute eng emaw chen chu ṭhut luih a ngai ṭhin.

'CALL 112' erawh hi chu a boring tak tak hmain a thawnthu awmzia a lang chho hman a, a hmawr bawkna phei chu pui tak a ni. A tir lamah chuan 'Mizo film satliah' emaw tih tur a ni hman ti ila kan sawi sual lo ang, mahse minute 20 hnu lam aṭang erawh chuan 'Mizo film hmuhnawm ber pawl' a ni tih loh chi a ni lo. En ve mah teh, i beisei aiin a hmuhnawm ang.

Script ziaktu Dr. Zarzosanga a fakawm tak zet. Vawi thum vel lai 'plot twist' a awm a, entute min bum kual a ni ber. Thil thlen dan tur min rinlawk tir a, kan rin loh angin thil a thlentir leh si. Fak a phu hle.

A changtute che vel a hmuhnawm a, film dang aṭanga kan hmelhriat tawhte bakah hmel thar hmuh tur a awm nual. Tunhma Mizo film-a 'lemchan ṭawngkam' deuh deuha ṭawng hriat tur a awm lo a, a khat tawkin entute min nuihtir deuh reng bawk.

CALL 112 hi 'visual' lam buaipuitu Leitlang Pictures kut chhuak niin a hmuhnawm lehpek a, sawi hmaih chi a ni lo. Tin, film chan hautak leh lutuk a nih loh hmel. Hmun tam takah an chang kual loa, chuti chung chuan film hmuhnawm tak an siam thei tho. Chu chu he film siamtute fakawmna dang a ni. Film budget sang tak hi film hnuhnawmna a ni kher lo a, chu chu he film siamtute hian an hmufiah hle tih a hriat.

December 10 aṭang hian he film hi Lersia Play-ah chhawp chhuah a ni dawn a, engzatin nge a en theih dawn la hriat chiah loh mah se mi nawlpui tak pawha sum chawi tam lo turin an chhawp chhuak dawn a ni.