Tham Luang cave-a tangte chanchhuah dan film-in siam dawn
Hlawhtlinna chan avang te, dinhmun khirh tak aṭanga harsatna paltlang a nih dan chanchin te pawh film-a siam a lo ni tawh ṭhin. Hetiang bawk hian tun hnaia Thailand-a football team Wild Boar soccer team te puk tihbaiawm tak aṭanga him dam taka chanchhuah an nih dan chu film-a siam a ni dawn.
American independent Christian film and television studio, Pure Flix chuan he film hi an buaipui dawn a, hma lak mek a ni. Pure Flix Entertainment CEO Michael Scott chuan, "Wild Boar soccer team leh an coach-te'n harsatna an hmachhawn dan leh an paltlang tak dan hian min hneh tak zet a, chona thar min pe a ni. A hmun ngeiah kalin ka zir chiang tawh a, an chanchin hi film-a siam loh phal chi a ni lo," tiin a sawi.
Scott chuan, "An chanchin hian midang tan chona thar a pe ngei dawn a, Kristian film-a chhuah kher a ṭulna a awm lo" tiin a sawi bawk.
He film siam nan hian $mtd 30-60 vel ruahman a ni a, sum pawh an seng hnem dawn hle. Puk chhung aṭanga him dam taka lakchhuah Wild Boar soccer palyer 12 leh an coach te bakah, chhanchhuah hna thawh laia boral Saman Kunan pawh film-ah hian tarlan tel a ni ang.
Scott hian kum 2008-2011 chhung khan Thailand-ah hian film panga zet a lo siam tawh a, he ram chanchin hre chiangtu a ni.
Kristian film lar 'God’s Not Dead' film siamtu Pure Flix Entertainment te kutchhuak hi khawvel hmuh chak a ni a, a changtu tur lam erawh tihfel a la ni lo thung.
He tih rual hian Wild Boar soccer team leh an coach te hian FIFA World Cup final chu a hmunah a en thei dawn lo. An tanna Tham Luang cave chu museum-ah an siam dawn nia tarlan a awm bawk.