Mizo Idol 2018 ; Tel tum tan form thehluh tawpni Lawmman atan Rs. 1,50,000 leh scooter

Mizo Idol 2018 thlanna chu July 25 hian ṭan a ni leh dawn ta a, tel tum te tan vawiin thleng form theh luh theih a ni. Mizo Idol atana thlan hian pawisa fai Rs. 1,50,000 bakah scooter a dawng dawn a ni.

Mizo Idol season 6-ah hian tel tum an ṭhahnem hle a, hming pelut pawh eng emaw zat an awm tawh a ni. Vawiin hi hming pek luhna hun tawp a ni a, Zonet Office, Zarkawt leh District hrang hranga Zonet sub-operator te hnenah ngaihven theih a ni. Form hi mahni awmna District-ah pawh lakchhuah a, thehluh theih a ni.

Audition neih a ni dawn

Mizo Idol thlanna hi changtlung leh felfai zawka neih tuma hma lak mek a ni a, audition pawh mumal taka kalpui a ni dawn. Audition hi Aizawl bakah District hrang hrangah neih tura ruahman niin, July 25 aṭangin ṭan a ni ang.

Champhai-ah neih hmasak ber a ni ang a, District dangah chhunzawm a ni ang. Audition neih tur hi live-a pek chhuah vek tum a ni bawk. District hrang hrang aṭanga tel tur thlanna hi August 8-ah zawhfel tura ruahman niin, hemi hnu hian intihsiakna tak tak a ni ang.

Tel thei chin

Mizo Idol 2018-ah hian kum bithliah a awm dawn a, kum 14-30 inkar tan tel theih a ni ang. Contestant chu Mizo hla sa thiam a ni tur a ni a, Mizo Idol 2015-a top 50 tling tawh te chu audition round paltlang sa an ni.

Lawmman a ṭha dawn

Zonet buatsaih Mizo Idol 2018-ah hian lawmman a ṭha dawn hle a, kum dang zawng aiin tel a man hla dawn. Mizo Idol atana thlan chhuah hnenah Rs. 1,50,000 hlan a ni dawn a, scooter a la dawng dawn cheu bawk. Pahnihna chuan Rs. 80,000 a dawng dawn a, pathumna hnehah Rs. 50,000 hlan a ni dawn bawk.

Top 5 chin ten Rs. 15,000 ṭheuh an dawng dawn a, top 10-a lang pa chin pawn Rs. 10,000-an la dawng dawn cheu bawk.