World Cup 2018 Final ; Miss Mizoram Thanthani ṭan France nge India stiker Jeje-a rin Croatia champion dawn?
FIFA World Cup 2018 chu a hmawrbawk a hnai ta a, Pathianni zan dar 8:30 hian France leh Croatia ten champion nih an inchhuh dawn. Russia khawpui Moscow-a inkhel turah hian Miss Mizoram 2018 T. Ramthanmawii (Thanthani) chuan France a ṭan dawn a, India striker Jeje Lalpekhlua erawh chuan Croatia a ṭan zawk tur thu a sawi.
Thanthani
Miss Mizoram nihna chelhmektu Thanthani chuan, "Final hi en ngei ka tum a, ṭan zawk tur hriat thiam a harsa khawp mai. Spain ka ṭan ber a, mahse an thlak tawh avangin final-ah chuan France ka ṭan ang," a ti. Thanthani hian France hian hnehna pawh an chan ngei a ring!
TBC-a
TBC Zaithanpuia chuan, "Pathian zarah kan dam anga en ngei ka tum tlat a ni. Ka ṭan ve ve ram ten final an khel tur hi lawmawm hle mah se, rilru a ti buai hle! Croatia hi team huaisen an ni a, champion tura rinkai Argentina an hneh hnu aṭanga khan ka ṭan a ni. Luka Modric-a story avang hrim hrim pawh hian Croatia hi ka ṭan a ni" tiin Croatia a ṭan chhan a sawi.
TBC-a chuan, " France hi chu an hming kan lo hriat ve an tam a, Chelsea ṭantu ka nih angin Kante leh Giroud telna ram hi ṭan chu an na khawp mai. Player naupang hmuhnawm leh hmabak nei eng tak Kylian Mbappé hi ka ṭan hle bawk.
Tu zawk zawk pawh champion se ka lawmpui ve ve ang," tiin a sawi a, an khel en phawt loh chuan ṭan zawk a sawi chiang thei lo! Chutih rual chuan France chu champion tura a rin zawk an ni.
Jeje
Hnathial tlangval Jeje-a chuan, "Ka dam a nih chuan en ngei ka tum. Ka ram ṭan ber Brazil an tla tawh a, final-ah chuan Croatia ka ṭan zawk ang," tiin, Croatia a dah sang zawk.
Rosy
Rosy K Remsangpuii chuan Luzhniki Stadium-a final khelh tur hi ṭhianhoa en an tum thu a sawi. Rosy chuan, "England ka ṭan ber a, mahse an tla ta si. Final-ah hian ṭan tur zawk pawh ka la hre chiah lo a, a chak zawk ka lawmpui tawp ang," tiin, England tel lohna final-ah ṭan tur zawk a hre rih lo. Rosy-i pawh hian champion tura a rin zawk chu France an ni.