World Cup closing ceremony-a perform tur Will Smith Korean boy band EXO leh BTS an chiang lo?

American actor leh singer ni bawk Will Smith chu FIFA World Cup 2018 final-a perform tur a nih thu nemngheh a ni ta. Hetih lai hian a tira perform tura tarlan Korean boy band BTS leh EXO te chu an dinhmun a chiang lo a, media-te chuan EXO zawk hi chu an inlan dawn niin an la tarlang tho a ni.

Will Smith a chiang

World Cup closing ceremony chungchangah hian nimin tlai khan press conference neih a ni a, American singer Will Smith leh Nicky Jam bakah Kosovar singer Era Istrefi te chu an inlan a ni. Anni pathum hi khawvel ennawm ropui tawp zana stage luah lum tur te an ni a, an che vel hmuh a chawk tawh hle.

Will Smith chuan, "World Cup ropui zia kan hria a, sawi nawn pawh a ngai lo. Closing ceremony-a ka inlan thei tur hi ka lawm tak zet a, chawimawina ropui tak a ni. Hetiang dinhmun ka luah thei tur hi ka inchhuang hle bawk a ni," a ti.

Nicky Jam pawhin, "Football ngainatu ka ni a, khawvel ennawm ropui ber hmawrbawknaa chanvo ka nei tur hi ka lawm a, mumang ang mai a ni," tiin, a lo suangtuah ṭhin a taka a tawng tur chu a phur thu a sawi. Era Istrefi chuan, "He hun hi ka ngaihtuah phak loh a ni a, chutih rual chuan hun ṭha ka neih erawh belhpelh ka tum lo. Ka phur tawh tak zet a, ka inchhuang hle bawk a ni," tiin a sawi.

Will Smith, Nicky Jam leh Era Istrefi te hian World Cup 2018 official song 'Live It Up' chu an perform dawn a ni.

BTS & EXO an chiang lo

Korean boy band BTS leh EXO te chu closing ceremony-ah hian an perform dawn niin media-te chuan an tarlang a, an hla an play ringawt dawn nia tarlang an awm bawk. He thu ziah lai thleng hian an perform dawn leh dawn loh a la chiang lo a, EXO zawk hi inlan tur anga tarlan an ni.

Closing ceremony chungchanga press conference neihah pawh hian an chungchang hi sawi lan a ni lo bawk a, hei vang hian thuthang lek vak pawh a tam phah hle a ni.

International Federation of Association Football (FIFA) chuan poll a lo buatsaih tawh a, vote thlaktu mi maktaduai thum chhuang zet te chuan Korean boy band hi an duh ber. Twitter alama poll buatsaihah chuan EXO ten hnehna an chang a, BTS in Instagram lamah ro an rel thung. Anni pahnih hi an perform dawn nge, an hla chauh play a ni dawn tih chu zawhna awm mek a ni.

Fans lam chuan EXO hla hit 'Power' ngaihthlak an chak ber a, BTS hla thulkhung 'Fake Love' chu Luzhniki Stadium chhunga ngaihthlak ngei an duh bawk.

Hetih lai hian American pop rock band Imagine Dragons hla 'Thunders' leh British rock band Queen hla hit 'We Will Rock You' te chu khawvel ennawm ropui ber tawp zan hian an play dawn nia tarlan a awm bawk.

World Cup closing ceremony hi Luzhniki Stadium, Moscow-ah neih a ni dawn a, German player ropui Philipp Lahm chuan World Cup trophy a chawi chhuak dawn niin an tarlang.