2020 MTV Video Music Awards

New York Governor Andrew Cuomo chuan 2020 MTV Video Music Awards chu sawm bik mi tlemte emaw, thlirtu awm loin emaw sem a ni dawn tih a sawi.

Kumtina buatsaih ṭhin MTV Video Music Awards hi kumin hian August 30-ah sem tum a ni a, Barclays Center, Brooklyn-ah ceremony buatsaih a ni dawn. Hrileng vangin sem hun sawn emaw ṭhulh emaw erawh an tum ve lo a, mahse semna hmunah hian mi tlemte chauh an tel a nih loh pawhin telpuitu an awm lo mai thei a ni.

MTV aiawha thupuangtu pawhin khawpuia thuneitute leh an hotute chuan inbiakna an nei tih sawiin, artist, fan, industry, staff-te leh an thawhpuite himna erawh an ngaihpawimawh ber thu a sawi thung. Barclays Center-ah hian kum 2013 khan MTV Video Music Awards semna hi an lo buatsaih tawh a, kuminah pawh hian helai hmuna hian buatsaih leh an tum a ni. 

MTV Video Music Awards hi kum 35 liam ta, September 14, 1984 khan a ṭum khatna atan  New York City Radio City Music Hall-ah sem a ni a, music lama che ṭhate chawimawina ngaih hlut hlawh ber pawl a ni a, award semna ceremony pawh hi 'Super Bowl for youth' tite pawhin an sawi hial ṭhin. A tlangpuiin nipui zawh hmain an sem ṭhin a, August emaw September-ah emaw an sem tlangpui. Kumin VMA hi virtual-a buatsaih a nih dawn leh dawn loh sawi lan a la ni lo a, tun dinhmunah erawh ceremony pangngai buatsaih an tum hle niin a lang.

VMA-ah hi chuan 'Video of the Year' award-in ngaihhlut a hlawh a hlawh ber a, nikum khan Taylor Swift chuan "You Need to Calm Down" vangin hemi video hi a dawng a ni. Award category hi belh leh paih an nei ve reng a, nikum kha chuan category 23-ah an sem a ni.

VMA-a zaithiamte'n award an dawn ṭhin hi thla(moon)-a astronaut a ding lai a ni a, MTV entirna hmasa ber pawh a ni a, 'Moonman' tiin an sawi ṭhin. MTV original logo design-tu Manhattan Design ngaihtuah chhuah tho a ni.

Kum 2017 khan MTV president Chris McCarthy chuan 'Moon person' tih a ni tawh dawn tih sawiin, tunah chuan New York firm Society Awards-in an siam ṭhin.