Box Office ; The Rock channa 'Skyscraper' ngam loh 'Hotel Transylvania 3'

American actor Dwayne 'The Rock' Johnson channa 'Sky­­scraper' chuan North Ameri­can Box Office-ah ngam loh a tawng a, chu chu animation film 'Hotel Transylvania 3 : Summer Vacation' a ni. Hotel Transylvania 3 hian kar liam ta chhung khan $mtd 44 lalutin No.1 a hauh a ni.

Tun hniah film tlangzarh zingah Skyscraper leh Hotel Transylvania 3 te hi boruak nei lian an ni a, Box Office-ah pawh an langsar hle. Fantasy leh comedy inkawp Hotel Transylvania hi US-ah chuan film en hlawh ber a ni mek a, sum lakluh lamah pawh a sang fal hle. Kar hmasa lama dinhmun sang ber luahtu Ant-Man and the Wasp chuan $mtd 29 lalut mah se, a dinhmun a humhim zo lo a ni. Hotel Transylvania-ah hian Selena Gomez chuan aw a thawh leh a ni.

Hetih lai hian July 1-a tlang­zarh Skyscraper chuan $mtd 24 lalutin, sum thawk chhuak hnem pathumna a ni. The Rock leh Canadian actress Neve Campbell te channa hi US-ah hian kar khat vel chauh chhuah a la ni a, a sum lakluh hi a pun zel a rinawm.

Khawvel hmun hrang hrang aṭangin $mtd 41.2 a laut tawh a, July 20 aṭang hian China-ah chhuah ṭan a ni bawk ang. China aṭang ringawt hian The Rock channa Rampage chuan $mtd 156.4 zet a lalut thei a, Skyscraper pawh hi beiseina a sang hle.

Incredibles 2 chuan $mtd 16.2 lalutin pali-na a ni a, Jurassic World: Fallen Kingdom chuan a dawt. Jurassic World hian $mtd 16.1zet a lalut leh a, Box Office aṭang hian $tld 1 chuang zet a lalut tawh a ni.

Top 10-ah hian tun thla film chhuak thar pahnih The First Purge leh Sorry to Bother You te chu an lang bawk.