American zinga billionaire ni thei naupang ber Kylie Jenner

Forbes magazine chuan Kylie Jenner hausakna chu $mtd 900 zet niin a chhut a, US khua leh tui zinga billionaire ni thei naupang ber a ni. A hmaa billionaire ni thei naupang ber chu Facebook hmuchhuaktu Mark Zuckerberg a ni a, Jenner hian a rawn khum ta a ni.

American reality television star Kylie hi August 10, 1997-a piang a ni a, kum 20 mi chauh a la ni. A lar em em a, a hmelin a zir vang te, a talent neih ṭhat avang leh sumdawnna kawnga a hlawtlinna vang tein he ti zat lek kumah hian billionaire a ni thei a ni.

Bulṭanna chu

Kylie Jenner hi kum 10 mi lek a nih aṭangin reality show-ah a inlan ṭan a, kum 2015 khan American television series lar 'Keeping Up with the Kardashians'-ah a inlan zui a ni. Larnain a ken tel hamṭhatna tam tak chu Jenner pawh hian chhawr ṭangkaiin sumdawnna lam a luhchhilh zui.

Ama hming chawiin 'Kylie Cosmetics' a din a, hausa turin kawng dik a zawh ṭan der. A tan engkim a awl sam a ni ber a, kum hnih a vei meuh chuan billionaire hial a ni thei ta a ni.

American model leh social media star ni bawk hian a sumdawnna aṭang hian $mtd 630 zet a lalut tawh a, a sum lakluhna pui ber chu a sumdawnna hi a ni. Kim Kardashian ($mtd 350) leh Beyoncé Knowles ($355) te ai pawhin a hausa zawk a ni.

Jenner chuan a hlawhtinna chungchang sawiin, "Ka thawk­rim em em a, sumdawnna lamah hian theih tawp ka chhuah a ni. Fan te leh min duhsak tute avangin tun dinhmun hi ka thleng thei a, an chungah lawmthu sawi sen loh ka ba a ni," a ti.

Kylie hi American hmeichhe hausa zual zingah a tel phak a, 27-na a ni. Kardashians leh Jenner family zingah pawh a naupang lam ni mah se, sum thawk chhuak hnem ber a ni.

Kylie hi August 10 khian kum 21 a tling dawn a, a pian thlaah hian Forbes Magazine hian cover girl atan an hmang dawn a ni.

Kum 19-ah in pathum!

American reality star Kylie hian teenager a nih lai khan in pathum zet a lei hman a, thil tithei ve tak a ni tih a chiang hle. Los Angeles leh Hidden Hills-ah te in a nei a, June thla khan California-a Calabasas-ah $mtd 3.9 man zet a lei leh bawk.

Kylie hian milar tak tak - Jennifer Lopez, Miley Cyrus leh Jessica Simpson te chenna kianga in neih a duh tawk mai lo a, Kim Kardashian leh a pasal Kanye West te hmuh phakah in a nei bawk.

Mark Zuckerberg

Facebook CEO Mark Zucker­berg hi kum 23 mi a nih laia billionaire ni thei a ni a, a hun laia hetiang dinhmun luah thei naupang ber a ni. Tunah chuan kum 34 mi lai a ni ve tawh a, a record khumtu pawh an rawn awm ve ta a ni.

Kylie Jenner leh Mark Zucker­berg te hi an hming lam rik a nih rual hian Evan Spiegel hming pawh lam rik a ni. Snapchat CEO Evan Spiegel hi kum 20 mi a nih lai khan billionaire a ni hman nia sawi a awm a, finfiahna erawh a awm lo thung.