TV-a YouTube hmangtu an pung nasa

YouTube hmangtute chuan phone-a en mai an duhtawk ta lo a, TV kaltlanga thlir duhtu an pung nasa hle.

Company chuan thu­chhuah an siamah US-ah chuan thla khat chhungin TV hmanga YouTube entu chu mi maktaduai 100 chuang an nih thu sawiin, TV-a an en hun pawh a pun nasat thu an sawi. Nikum lam ai khan 80% laiin TV kaltlanga YouTube enna atan hian hun an hmang nasa zawk a, nikum nena khaikhin thoin kumin March thleng khan an application live content entute en hun chhung chu 250% laiin a pung tih an sawi bawk.

YouTube hian an New­Fronts presentation peng pakhat atan hemi chungchang hi an tarlang a ni. An original programming lineup thar tur 'Ultimate Home Championship' chungchang pawh tarlang nghalin he programme-ah hian infiammite leh YouTube personality-te an inel ṭhin dawn. Hemi kaltlanga an sum hmuh tur hi Covid-19 dona kawng atan an hmang dawn a, Stephen Curry chuan a host dawn a ni.

Hripui len vangin mi inah an awm tam a, hei vang hian YouTube programme hrang hrang pawhin thlirtu an ngah zual hle. Eirawng bawl kaihhnawih video chu nikum lam ai khan 45%-in entu an tam zawk a, ina 'workout' video lam chu March thla laihawl thleng khan nikum lam aiin 200% laiin an tam tawh zawk bawk.