School curriculum-a video game telh hmasa ber ram Poland

Poland sorkar chuan kum 2020/21 academic session ṭan hunah high school zirlaite curriculum-ah video game, 'This War Of Mine' an telh a ni.

Poland ram hi zirlaite zirlaia video game telh hmasa ram a ni a. ISFE (Interactive Software Federation of Europe) member Spidor chu an school zirlaia video game telh tur a nih thu hi an tarlang a, he game hi indo game mah ni se game kheltute chuan tualchhung mi (civil) role an play dawn a, hmatawngah an ṭang dawn lo. Hei vang hian zirlai­ten sociology, ethics, philo­sophy leh history an hriat thiam leh zualna tur atan an ti a ni.

He game hi Polish game development company, 11 bit studios chuan a siam chhuak a, kum 2014 khan tlangzarh a ni. Spidor hotupa Dr. Dominika Urbanska-Galanciak chuan zirlaite curriculum-a game dah tum hi khawvela thil la thleng ngai lo a nih thu a sawi a, zirlaite chuan indonaa civil-te dinhmun an hriat thiam phah tur thu leh ethical issue an man thiam phah dawn thu a sawi bawk.

'This War Of Mine' hi survival strategy game a ni a, Microsoft Windows, OS X, Linux, Android, iOS, PlayStation 4, Xbox One leh Nintendo Switch-ahte khelh theihin an siam tawh. He game hi Indopui II hnu lamah 'longest city siege' tia an sawi 1992–96 'Siege of Sarajevo' hunlaia  Bosnian tualchhung mite dinhmun hrehawm lutukin a game siamtute rilru a hneh vanga siam a ni.