Ryan Reynolds-te nupain hmeichhe chawisanna atan $200k thawh

Midang ṭanpuina kawnga thawhhlawk ṭhin tak Ryan Reynolds leh Blake Lively-te chu an che chhuak leh ta a, indigenous women's leadership initiative tan $200,000 lai an thawh.

He programme buatsaihtu  St. Francis Xavier University Coady Institute, Nova Scotia, Canada hnenah pawisa tam tham tak Reynolds-te nupa hian an pe a ni. An nupaa thuchhuah an siamah ram neitu hmeichhiate tana Coady Institute-in programme an buatsaih chu an lawm thu leh an thlawp thu an sawi a, an hnathawk chungchang an hriat chuan an rilru a hneh hle tih leh an hma­lakna zelah pawh tel­pui an duhthu an sawi.

Coady Indigenous Programme buatsaihtute pawhin Ryan-te nupa chunga an lawm thu hi an tarlang a ni. Lively leh Reynolds-te hi midang tan an luang chhuak nasa ṭhin hle a, #Blacklivesmatter movement-ah pawh khan NAACP Legal Defense Fund tan $200,000 tho an lo thawh tawh bawk.

Green Lantern film an chan dun aṭanga inngaihzawng chho Blake Lively leh Ryan Reynolds-te hi September 9, 2012 khan an innei a, fanu pathum nei tawhin  Pound Ridge, New York-ah an khawsa mek a ni.