Encanto bawk pakhatna a ni leh

Box Office-ah thil danglam lian tham a awm loa, kar hmasa lam che ṭha ho bawk an che ṭha nawn leh.

Kar hmasa lama pakhatna 'Encanto' bawkin sum a lalut tam leh ber a, theatre 3,980 aṭangin $13,147,618 a lalut. 'Ghostbusters: Afterlife' bawk pahnihna a ni leh a, pathumna pawh kar hmasa lama pathumna 'House of Gucci' bawk a ni leh.

'Encanto' hian North America aṭang ringawtin $58,368,259 a lalut der tawh a, ram dang aṭangin $59,019,246 lalut tawh bawkin $117,387,505 lai a hmu chhuak der tawh.

Film thar
Kar tawp Box Office Mojo chart-ah film thar erawh a awm nual. Palina 'Christmas with the Chosen: The Messengers' chu film thar a ni a, he film hi 'The Chosen' series en ṭhinte tan chuan film hmuhnawm tak tur a ni a, a trailer aṭang ringawt pawhin film enchakawm tak a ni.

10-na 'Sword Art Online: Progressive - Aria of a Starless Night' chu film thar ni bawkin, True to the Game 3 (17), Benedetta (18), Wolf (22), Tadap (24), Try Harder! (27) leh Flee (30)-nate chu film thar an ni bawk.