Gospel band thar Altar Call hla thar nen

Mizote hian zaithiam ṭha tak tak nei mah ila Band lam erawh kan ngah lo hle, amaherawhchu Gospel band thar 'Alter Call' chu nizan khan hla thar nen an rawn inlan a, live music ngainatute tan chuan thu lawmawm tak a ni ngei ang.

Alter Call hian Krismas hla mawi tak, ‘Nausen thianghlim’ tih chu tichhuakin nizan khan Zonet lamah chuan he hla hi tihchhuah a ni tawh a, Supertrio member Robert Lalduhzuala-a YouTube channel, SimpleFam lamah zanin aṭangin duh hun huna hmeh chhuah theihin a awm ang. Robert Lalduhzuala hian he hlaah hian a zaipui nghe nghe a ni.

Band thar mah ni se an 'original' hla nen Mizo rimawi khawvel an rawn luhchilh nghal a, an hla rawn tihchhuah hi an vocalist Pecos Lalremsanga phuah a ni. Mizo musician ṭha ber ber- Victor Da Scavenger, Ztpa (DropDoubt), Eric Renza (The Prophets) leh Dave (Albatros)-te pawhin Altar Call hi an fak a, chuvang chuan belhchian an dawl ngei ang.

An vocalist Pecos hi Robert Lalduhzuala u a ni a, Guitarist Sawmtea, Bassist Amawia, Keyboardist Ramzauva niin, drummer hi zaithiam kan hriat lar em em Hlimhlimi nau Sawmtea a ni bawk.